Det var berre heilt i byrjinga av kampen at Bergsøy var med på notane under onsdagens historiske kvalifiseringskamp i Herøyhallen. Kristiansand låg stort sett føre heile vegen, og gjekk også til pause med ei solid 17-8-leiing. Leiinga var fullt fortent, og Bergsøy-spelarane såg ikkje ut til å forstå kva som møtte dei. Kanskje ikkje så rart, då begge lag sine trenarar var klare på at Bergsøy var favoritt før avkast.

I andre omgang klarte gjestane frå Sørlandet å halde leiinga stabilt på rundt ni mål, og frustrasjonen steig blant Bergsøy-spelarane. Uvanleg mange feil i angrepsspelet, kombinert med dårlege involveringar defensivt felte Bergsøy gong på gong. Kristiansand-backane Jon Robertsen, Mathias Christiansen og Henrik Westgaard fekk lov å spele sitt spel, og då vart det vanskeleg for heimelaget. Trioen Markus Buchardt, Evaldas Grieze og Håkon Tømmerdal Forberg klarte aldri å markere seg slik som vi er vane med å sjå dei, og sjølv om Emil Raknes heldt fram storspelet på kanten, var det ikkje nok for eit Bergsøy som til slutt tapte 26–35.

Robertsen, Christiansen og Westgaard blei også toppscorarar for Kristiansand med seks mål kvar, medan Emil Raknes scora mest for Bergsøy med ni mål. Evaldas Grieze scora fem.

– Haglar av tekniske feil

Bergsøy-trenar Thomas Buchardt var ikkje overraskande skuffa etter kampen. Han innser samtidig at Bergsøy no har ein svært tøff jobb føre seg.

– I dag haglar det av tekniske feil og angrepsspelet vårt er utan rytme. Vi er ikkje på, og for meg verkar det som gutane er prega av alvoret.

– Kva gjer dokke no?

– No skal vi sutre i kveld, men i morgon då skal vi «gunne» på. Då er det tilbake på trening, også skal vi stille best mogleg førebudd på søndag. Det er ikkje over, men det ser vanskeleg ut, seier Bergsøy-sjefen.

Han er likevel optimistisk, og trur sesongen kjem til å ende med opprykk.

– Eg er framleis sikker på at vi kjem til å rykke opp, men det blir kanskje ikkje mot Kristiansand, seier Buchardt.

Taparen av dobbeltkampen mellom Bergsøy og Kristiansand får nemleg ein ny sjanse neste veke. Der møter taparen laget som taper kampen mellom Lillehammer-Faaberg og Fjellhammer. Også på Lillehammer var det gjestane som tok ein klar siger, og Fjellhammer vann til slutt 36–25. Dermed er det mykje som tyder på at det er Bergsøy og Lillehammer-Faaberg som må ut i «tapar-duellen» neste veke.

– Trur Bergsøy rykker opp

Kristiansand-trenar Robin Rosander Haugsgjerd var sjølvsagt svært fornøgd med det laget hans presterte i Herøyhallen.

– Vi veit at laget vårt er gode nok for 1. divisjon, og i dagens kamp er vi gode. Men også Bergsøy er eit bra lag, så vi måtte jobbe for denne sigeren, seier Haugsgjerd.

– Kjenner du deg trygg på at de tar opprykket no?

– Vi har eit svært godt utgangspunkt, men kampen skal spelast først. Det er mykje som kan skje i løpet av 60 minutt, seier Kristiansand-trenaren.

Han vil gjerne legge til ein ting.

– Eg trur Bergsøy kjem til å rykke opp. Det var ikkje overraskande at Fjellhammer vann greitt, og eg trur Bergsøy klarar det på neste sjanse, avsluttar Kristiansand-trenaren.

Også søndagens kamp blir sendt direkte på vestlandsnytt.no. Avkast i Kristiansand er klokka 18:00.