Eg kjenner mjølkesyra bruse i leggane i det eg er ferdig med første stigninga. Vel oppe på Lundeura, møter eg på ei storfamilie som er ute på tur. Harald Runde og kona Kari er utflytta herøyværingar som har slått seg til ro i Innvik i Sogn og Fjordane. No har dei feriebustad på Eggesbønes, og er på ferie her saman med heile familien sin.

- Far min, Sverre, var frå Runde, og var gift med Gudbjørg. No ligg han gravlagt på kyrkjegarden her. Det er koseleg å kome tilbake hit med heile familien, og enda kjekkare er det når vêret er så bra, seier Harald medan han ser på Kari og smiler.

Dottera Hilde Kristin Sporsheim og mannen hennar Per-Kristian Sporsheim fortel at dei mellom anna har vore på Bø sommarland i sommar, men at det er kjekt å kome heim til Sunnmøre.

- Det er veldig fint her. Vi kjenner det er godt å kome heim til kysten. Det er litt akklimatisering, fortel Per-Kristian.

- Dei aller fleste av oss har vore her før, men dette er fyrste turen hit for Rebekka og Sara, seier Hilde Kristin og gløttar bort på borna. Jakob, yngstemann i flokken, sit saman med hundane Dino og Tanja og nyt sola.

Jon Øyvind Runde, sonen til Harald, har også vore på austlandet i sommar.

- Det er godt med ferie. Eg har fått testa ut campinglivet også, seier han.

- Håpar folk tek vare på fjellet

I det eg startar å gå opp til Rundebranden, møter eg på eit eldre ektepar som står og tek bilete av den vakre utsikta mot Fosnavåg. Gert Mastenbroek og Martha Tiedema kjem frå Nederland, og seier at dette er fyrste gong dei er i Noreg.

- Vi er på rundreise, og har blant anna vore i Geiranger, Ålesund, Stavanger og Bergen, fortel Gert.

Ekteparet skal vere i Noreg i litt over to veker, og seier dei har fått kjenne litt ekstra på turistlivet.

- Vi var i Ålesund i går. Der var heile fem turistbåtar, og stappfullt i gatene. Det var litt betre å kome hit, for det er ikkje så mange turistar her.

- Fuglefjellet på Runde er ein av plassane vi var fast bestemt på å besøke. Det er så vakkert her, spesielt no når det er fint vêr i tillegg, legg Martha til og smiler.

Dei fortel at det var litt fleire turistar på Runde enn dei forventa, og håpar at naturen ikkje tek skade av turismen.

- Eg trur dei som bur her, og turistane som kjem hit, gjer det dei kan for at turismen ikkje set store spor i naturen. Eg håpar folk tek vare på denne flotte plassen, slik at fleire generasjonar får oppleve dette, seier Gert.

- Vi vart positivt overraska

Vel oppe på Rundebranden ser eg fleire grupper med fuglespeidande turistar. Blant dei sit Leon og Evelyne Janssen og et ein god lunsj saman med sine to gutar, Thorsten og Lasse. Dei er også frå Nederland.

- Vi har vore i Noreg to gongar før, for to og ti år sidan. Denne gongen tok vi Kiel-ferja til Oslo, og køyrde hit med bubil, seier Evelyn, og fortel at dei også var i Ålesund dagen før.

- Men det er absolutt mykje betre å vere her. Eg må seie eg er imponert over både naturen og utsikta, legg ho til.

Leon seier seg einig, og meiner turistar er meir respektfulle mot naturen her.

- Vi gjekk opp til Fjellstua, og det var så mange turistar der. Is-papir og kaffikoppar låg strøydd ut over heile plassen. På Runde er folk mykje flinkare til å rydde opp etter seg. Dei er meir respektfulle mot naturen og dyrelivet her.

- Vi var førebudde på at det skulle vere mykje meir folk her, så du kan trygt seie at vi vart positivt overraska. Dette er jo ein heilt fantastisk plass, fortel Evelyne og ser ut mot havet.

Thorsten og Lasse speidar nysgjerrig etter fuglane, medan dei sit og et brødskiver med Nugatti på.

Eg møtte folk frå både Sverige, Danmark, Belgia, Nederland og Kroatia denne sommarsdagen, alle like blide og spente på om dei fekk nokre glimt av lundefuglane. På parkeringsplassane hadde turistane stilt seg og på rekke og rad, klare for å nyte ein dag med ekte, norsk sommar.