Det er dagen før dagen då Havila Kystruten skal bli presentert for mellom 500 og 550 menneske under opningsfesten på NTW (Norwegian Travel Workshop) i Ålesund. Ein handfull gode kundar sit tett i tett i eit lite konferanserommet i Havila-bygget på Mjølstaneset. Ein del av dei er harde konkurrentar. Alle har interesse av Havila Kystruten.
Njål Sævik er i full sving med å presentere familieselskapet si historie, medan bilde av familiemedlemer og båtar dukkar opp på lerretet ved sida av han. Snart kjem fleire sentrale personar fram for å snakke om kva vi kan vente oss av den splitter nye kystcruise-spesialisten.
– Verdas mest miljøvennlege skip
– Vårt oppdrag er å tilby trygge, berekraftige og eventyrlege reiser. Vi startar med å segle frå Bergen til Kirkenes frå januar 2021. Det vert 34 stopp nordover og 33 stopp sørover. Vi har ein 10 årskontrakt med den norske stat, forklarer administrerande direktør Arild Myrvoll på engelsk til det lydhøyre publikummet.
I slutten av år 2020, skal Havila Kystruten få levert fire flunkande nye cruiseskip frå to verft i høvesvis Spania og Tyrkia. Skipa er 124,1 meter lange, har kupear til heile 468 overnattande passasjerar og fasilitetar for 172 dagpassasjerar. Der vil også vere plass til bilar. Fartøya kjem til å ha ein «servicehastigheit» på 14–15 knop og makshastigheit på 18,2 knop, informerer teknisk direktør Kjell Rabben.
Ikkje minst vert båtane dei mest miljøvennlege fartøya som nokon gong har vore bygd, lovar han.
– Dei går på LNG (naturgass), som gir ein reduksjon på rundt 25 % i CO₂-utslepp. I tillegg har vi det største batterisystemet som finst og kan køyre fire timar på berre batteridrift. No gjer vi det vi kan for å få folk til å setje opp ladestasjonar rundt omkring på dei destinasjonane vi kjem til langs kysten, seier Rabben.
Fasilitetar
Etter å ha blitt presentert for dei tekniske spesifikasjonane, får gjestane ein gjennomgang av kva for fasilitetar skipa skal ha. Truls Are Hoff har ansvar for alt som har å gjere med hotelldrift, utvikling av ulike konsept, mat, utflukter og alle aktivitetar om bord. Det er ikkje utenkeleg at publikum – som først og fremst skal selje gode reiseopplevingar – spissar øyra litt ekstra når han snakkar.
– Vi har lugarar i mange ulike storleikar, der den minste er på 16,2 kvadratmeter og den største er på 37,4 kvadratmeter, seier han.
Dei mest luksuriøse lugarane er store og har flotte balkongar, medan dei minste minner meir om fine, men tradisjonelle hotellrom.
Hoff snakkar mykje om mat:
– Der er stor etterspurnad etter norsk mat. Vi skal bruke norske råvarer frå heile landet. Vi har også tilgang på kvalitetsmat som er produsert i kort avstand frå skipet. Eit godt døme er Moens Mat, som de har fått smake litt på her i dag. Vi skal nytte oss av både små og store matleverandørar. All maten vert laga frå botnen av om bord i skipet. Kjøkkena vert utstyrte med moderne teknologi, slik at kokkane sparar tid og det vert mindre matsvinn, seier Hoff, før han legg til at dei også skal syte for skikkelege alternativ til vegetarianarar og veganar.
Skipa vil også ha fasilitetar som badstue, Jacuzzi, treningsfasilitetar, fleksible serviceområde med matservering, roomservice, eteplassar og «nokre overraskingar».
– Ikkje minst skal du kunne nyte naturen frå alle vinklar over heile båten, seier Hoff og viser til det 210 metrane med dekk og dei mange balkongane som strekkjer seg rundt heile cruiseskipet.
Hamn til hamn-løysing?
Tilbakemeldingar frå marknaden tyder på at fleire ønskjer moglegheit for å bestille såkalla hamn til hamn-reiser. Slike reiser er billegare og dermed meir overkommelege for «folk fles».
– Forhåpentlegvis kan litt av kapasiteten vår bli brukt på hamn til hamn-reiser på utvalde destinasjonar. Det er noko vi jobbar med, seier sals- og marknadssjef Tor Johan Pedersen.
Om berre 21 månadar kan Havila Kystruten ønske sine første gjestar om bord.
– Det er litt skummelt. Vi skal ikkje gløyme at hovudgrunnen til at folk reiser i Noreg er den fantastiske naturen, tradisjonane og folket vi har, avsluttar Tor Johan Pedersen.