– Hemmelegheita ligg rett utanfor her.
Vi sit i personallokala på Runde miljøsenter og dagleg leiar for Arctic nutrition, Ole Arne Eiksund, peikar ut på havet medan han pratar.
Ved sida av Eiksund sit Hogne Hallaråker som er gründeren bak bedrifta. Dei to er på Runde saman med resten av forskarane og salspersonalet i bedrifta for ein seminardag ute i havgapet.
– Det var naturleg for oss å legge seminaret til Runde då det er utanfor denne øya størsteparten av råstoffet vårt kjem ifrå, forklarar Eiksund engasjert.
Silderogn- ei gullgruve?
Råstoffet som Eiksund siktar til er rogna til sildestamma som gyt rett utanfor fugleøya. Silderogna har nemleg vist seg å bli ein revolusjon for bedrifta som til dagleg held til i Hovdebygda.
– Vi har allereie gjort stor suksess med vårt kosttilskot, Romega, eit produkt som eine og åleine er basert på rogna til silda, forklarar Halleråker, som elles også kan fortelje at Herøyværingar har blitt deira beste kundar på dette produktet.
Grunnen til at gjengen har valt å satse på det som elles er å rekne som eit biprodukt i sildefangsten, er den unike evna stoffa i rogna har på betennelsar.
– Vi har funne ut at silderogn har ein unik betennelseshemmande effekt. Vi ser dette som revolusjonerande i forhold til autoimmune sjukdommar, forklarer Hallaråker.
Å bruke silderogn som kosttilskot er Arctic Nutrition heilt åleine om i verda, og no er gjengen klare for å satse på eit heilt nytt produkt av silderogna. Dette er eit produkt som etter alt å døme kan bli ei gullgruve, om forskingsprosjektet som er på gong på Haukeland universitetssjukehus kjem ut med positive resultat. Då vil produktet bli utvikla som godkjent legemiddel.
– Det største sidan penicillinet
Den siste nyvinninga deira, Psorax35, er nemleg gjenstand for eit omfattande forskingsprosjekt i Bergen. Det dei skal finne ut, er om Arctic Nutrition faktisk har funne kuren for psoriasis. Det er ein betennelse i huda som kan gi utslett over store delar av kroppen. Ein utbreidd sjukdom.
– Eg har sagt det på fleire møter, dette er det største sidan penicillinet, smiler Hallaråker, i det han forklarar om prosjektet.
Forskningsprosjektet har pågått sidan starten av året og har ei testgruppe på 60 pasientar med psoriasis.
– Vi veit dette fungerer så vi gler oss til å sjå kva forskinga konkluderer med i sommar, fortel Eiksund og Hallaråker.
Uante ressursar
Med oss frå miljøsenteret er også Nils Roar Hareide som ser med begeistring på at bedrifta har tatt i bruk biprodukt frå fiskerinæringa.
– Eg har rekna litt på det og det er snakk om store mengder biprodukt frå fiskerinæringa som ikkje blir nytta, fortel Hareide som estimerer mengdene til å vere kring 30 000 tonn i året.
Blant desse biprodukta er blant anna silderogn.
– Eg er overbevist om at der er eit stort potensial i mykje av biprodukta, held han fram.
Sjølv om miljøsenteret ikkje har noko med prosjektet å gjere, ser Hareide på dette som eit eksempel på kvifor det burde samlast inn informasjon i ein «biobank» som verksemder som Arctic Nutrition kunne ha nytte av i utviklinga av nye produkt og forsking. Han siktar då også til næringsanalysen som Miljøsenteret allereie har gjort for kommunane på søre, der ei slik biobank er skissert.