– Eg synast det gjekk bra for min del, då eg fekk nok speletid til å vise meg fram, og føler sjølv eg gjorde det bra då eg fekk sjansen, seier Buchardt etter å ha komen heim til Noreg.

Bergsøy-spelaren var med U-landslaget (LM00) for første gong, då dei førre veke reiste til Romania for å spele ei firenasjonersturnering.

I den første kampen møtte dei norske gutane Sveits, og her måtte dei tole eit 36-29-nederlag. Buchardt scora eit mål.

I neste kamp mot Russland gjekk det betre, og Noreg drog i land ein 27-22-siger. Også i denne kampen teikna Buchardt seg på scoringslista ein gong.

I den siste kampen mot vertsnasjonen Romania, gjekk det litt tyngre for dei norske handballgutane. Her blei det tap 29–33. I denne kampen noterte Buchardt seg for to scoringar.

Til handballforbundet sine eigne nettsider har landslagstrenar Johnny Jensen uttalt at dårleg forsvarsspel, men også mange tekniske feil i angrepsspelet er hovudårsaka til at resultata vart som dei vart.

– Kan alltid bli betre

Buchardt sjølv ser berre positivt på landslagsturen.

– Sjølvsagt er det periodar der eg kan gjere det betre, men slik vil det alltid vere. Samla sett er eg nøgd med eigen prestasjon, og fire mål. Samtidig som dette har vore ei oppleving for livet.

Fokus på Bergsøy

Buchardt sluttar seg no til dei andre Bergsøy-spelarane att, som førebur seg på søndagens bortekamp mot Viking TIF 2 i Bergen.

Medan Markus Buchardt har vore i Romania, har dei andre Bergsøy-spelarane fått to veker med trening. Noko Bergsøy-trenar Thomas Buchardt på førehand såg fram til. So det er truleg eit skjerpa Bergsøy-lag som gjer seg klare til ein ny kamp.

Dei siste tre kampane har enda med siger for herøyværingane, og laget har plassert seg heilt i toppen. Motstandar Viking TIF 2 har slite meir, og ligg på nedre halvdel. Men Markus Buchardt åtvarar mot å tru at det blir ein enkel kamp i Haukelandshallen.

– På papiret er det eit lag vi skal slå, men vi kan ikkje undervurdere dei. Dei har eit godt lag med mange gode spelarar. So vi er nøydde til å vere skjerpet og fokusert på det vi skal, slik at vi får med oss to poeng heim, seier Buchardt.