Heile 87.000 oppdrettstorsk rømde frå anlegget. I praksis tilhøyrer Voldsfjorden same fjordsystemet som vi har ute i øyane, og det er grunn til å tru at mykje av den rømde oppdrettstorsken har funne vegen også til våre nære farvatn. I sjøen er det slik at alt høyrer saman med alt.
Største fiskerøminga i fjor
At saka har vekt stor merksemd inn om fjorden, er forståeleg. På Ytre Søre har rømminga kanskje gått litt under radaren. Fiskeridirektoratet ser alvorleg på saka og har oppretta tilsynssak. Selskapet som eig merdane har også blitt meldt til politiet. Saka bør bli gjenstand ikkje berre for undersøking av lokal, men av nasjonal karakter.
No er fleire oppdrettsanlegg for torsk på gang langs heile kysten, sidan det syner seg at oppdrettstorsk i sjøen syner seg å fungere. Det skjer etter mange år med prøving og feiling for å finne rette formelen.
I avisa Nærnett uttalte seniorforskar ved Norsk institutt for naturforsking (NINA), Sten Ola Karlsson, seg om saka i haust:
– All form for rømming av domestiserte artar er alvorleg. Dette kan potensielt bli eit stort problem. Viss vi ser på erfaringa vi har frå lakseoppdrett, så veit vi at dersom oppdrettsfisk kryssar seg med villaks, vil dette føre til negative konsekvensar på genetikken til fisken.
Mellom anna seier det seg sjølv at oppdrettsfisk ikkje er tilpassa eit liv der han må finne føde sjølv. Den store frykta er at innblanding av oppdrettsfisk mellom villfisken på sikt vil skade villtorsken.
Torskeoppdrett er nok kome for å bli, og det kan syne seg å bli ein suksess. Optimismen er enorm. Konsekvensane med rømming av oppdrettslaks kontra villaks kan i verste fall bleikne i høve til det skadepotensialet som ligg føre når det gjeld oppdrettstorsk i høve vill torsk.