Det seier Jan Åge Fjørtoft. Fotballprofilen frå Gursken arrangerer 26. juni den første utgåva av Gursken-konferansen.

Jan Åge, som sjølv driv med føredrag og konferansar både i inn- og utland, seier til Vestlandsnytt at det har vore ein draum for han å kunne få til noko slikt på heimebane:

Idretten som døme

– Det handlar om å skape og dele, begeistre og inspirere. I ein slik samanheng passar det veldig godt å kome tilbake til røtene, til Sunnmøre som er kjend for si store verdiskaping.

Jan Åge nøler ikkje med å bruke idretten som døme på kva ein kan få til. Sjølv har han ein fotballkarriere som starta heime på River Plate i Gursken, og som tok han ut i verda.

– Vi har fleire. Kjetil Hasund, Åge Hareide og Karsten Warholm er andre døme, og lokalt har vi også fått fleire norgesmeistrar frå bygdene i Sande også, med Hødd. At draumar kan bli realitet og suksessar har vi også massevis av gode døme på frå vårt lokale næringsliv. Eg ser med stor interesse på at det er mykje ny gründerverksemd på Sunnmøre, seier Jan Åge.

Konferansen vert presentert med tittelen «Merkevara Sunnmøre». Det er Jan Åge Fjørtoft, og hans selskap Fiveone, saman med Sparebanken Møre, som står bak.

Gymsalen i Gursken

– Tanken er at det skal vere gratis. Det blir ein rå og enkel bakgrunn, der det skal føregå i gymsalen i Gursken skule, opplyser Jan Åge.

Gursken-konferansen tek mål av seg til å bli ein møteplass for dei tradisjonelle gründerane og unge entreprenørar med nye idèar som vil sikre vekst.

Listhaug og Reitan

Konferansen, som siktar seg inn mot maritim næring og reiseliv, og er for små og mellomstore aktørar, har nokre kjende namn som innleiarar:

Sylvi Listhaug skulle vere kjend for dei fleste. Ho er nestleiar i Frp og sjølv sunnmøring. Rune Garborg, som står bak Vipps, skal snakke om merkevarebygging. Ole Robert Reitan, adm. dir. i Rema 1000 kjem også. Det same gjer Finn-direktør Kristin Sætevik. Debattleiar vert Jan Åge Fjørtoft.

– Målet er at denne konferansen skal bli ein fast tradisjon, seier Jan Åge avsuttingsvis.

Det har allereie teke til å kome bra med påmeldingar til denne historiske, første Gursken-konferansen.