Systrene Lystad har hatt ferie i tre veker, og har lest ut det meste av bøker dei har hatt med seg. Tysdag ettermiddag var dei på biblioteket for å låne enda fleire bøker.

Maria (5) skal byrje i 1. klasse og har mange bøker å lese framfor seg, men hittil er det «Marikken» av Astrid Lindgren som er favoritten.

– Den handlar om Marikken og systera hennar, Lisabeth. Mora og faren deira er også med i boka. Og så er det mange dyr der. Eg likar best å lese bøker med både tekst og bilete i.

Systera Sara (8) likar best «Gangster-bestemor», av David Walliams.

– Eg likar også å lese bøker med både tekst og bilete. Eg sit som regel å les på rommet mitt, eller på hytta.

– No må vi hugse på å leggje inn bøkene dykk har lest på nettsida, så vi kan sjå om dykk får hente ut premiar i dag, seier Kristin Lystad, mora til Maria og Sara.

– Ja! Svarar systrene i kor.

Skaper stimulans

Kristin F. Husøy, bibliotekleiar i Herøy, har allereie delt ut 10 premiar i dag. Ho seier talet på deltakarar har auka sidan i fjor.

– Vi har hatt ei enorm auke frå 70-80 born, til over 200 i år. Det er heilt fantastisk. Borna vert nysgjerrige på å lese, og det er akkurat det vi er ute etter med denne kampanjen.

Ho fortel at bøker og sidetal i Sommarles er tilpassa ulike nivå. Dess eldre ein vert, dess tyngre bøker kan ein lese.

– Borna likar utfordringane. Å meistre litt tyngre bøker, og ikkje minst lesing i seg sjølv, skaper ein stimulans. Det beste er at ein kan lese overalt. I godstolen, på plenen eller i bilen.

Husøy meiner lesing er med på å normalisere sommarferien, og at ferien ikkje berre er til for reising.

– Det er ikkje alle som kan fare på ferie, av ulike grunnar. Difor kan Sommarles og bøker vere ein del av feriepakken.

Ikkje for seint å melde seg på

– Eg ser dagleg born som kjem ned trappa til biblioteket. Auga deira lyser opp, spesielt med dei yngste, når dei skal hente premiar. Dei kjem bort til skranken, og eg spør dei forsiktig: «Er du Sommarlesar?». «Ja», kviskrar dei, fortel Husøy.

Bibliotekarleiaren vil minne både born og føresette på å hugse å registrere bøker dei har lest på Sommarles si nettside.

– Vi skal ha bokfest i september, der alle som har vore med på Sommarles er inviterte. Så det er berre å melde seg på, det er ikkje for seint enda.