Fylkesrådmannen rår til at ny Nerlandsøy bru blir bygd rett nord for eksisterande bru, og frårår samtidig det regulerte brualternativet over småbåthamna.
I samferdselsutvalet 12. juni vil fylkesrådmannen på nytt legge fram ei sak om Nerlandsøy bru. Saka bygger på ei prissamanlikning av fleire alternative løysingar, og fylkesrådmannen er klar på at alternativet med ei 600 meter lang bru over småbåthamna ikkje kan tilrådast.
Sparer 130 millionar
Slik fylkesrådmannen ser det, må kostnaden vege tungt når bruløysing over Søre Vaulen skal veljast. Difor kan han ikkje tilrå å bygge bru etter alternativet som reguleringsarbeidet så langt har basert seg på. Forventa kostnad for dette alternativet lyder no på 630 millionar kroner, medan alternativet rett nord for eksisterande bru kan realiserast for 500 millionar kroner.
Inn på økonomiplanen
Denne summen til Nerlandsøy bru vil bli lagt inn i saka som fylkestinget snart får om endringar i investeringsbudsjettet fram til 2022. I forslaget til revidert økonomiplan står Nerlandsøybrua oppført med 50 mill. i 2020, 300 mill. i 2021 og 150 mill. kroner i 2022.
350 meter lang bru
Rett nord for eksisterande bru kan lengda på ei ny bru kortast ned til 350 meter, eller gjerast enda kortare med å auke utfyllinga både i hamnebassenget på Kvalsund og på Igesundsida. Då vil ein kunne kome ned på ei lengd på mellom 235 og 250 meter, men nærare planlegging må til for å fastsette den endelege brulengda.
Sør for ekstserande bru kan ny bru byggast enda billegare, men for å unngå konflikt med kultuminna tilrår fylkesrådmannen det noko dyrare alternativet nord for eksisterande bru.
Ferdig i 2023
Fylkesrådmannen ser føre seg å nytte konsulent til utarbeiding av ny reguleringsplan og detaljregulering av brua. Desse prosessane kan gå samtidig. Om arbeidet med å engasjere konsulent startar no i sommar kan konsulent vere på plass før jul.
Med eit ei planleggingstid på 12 månader kan prosjektet vere klart til utlysing på anbod før årsskiftet 2020/21. Fylkesrådmannen ser føre seg kontrahering i februar 2021, og at brua kan stå ferdig 20 månader seinare.