Det kjem fram av Møre og Romsdal fylkeskommune sin fylkesstatistikk som nyleg vart gjeven ut.

Av tala kjem det fram at medan 339 personar reiser frå ei anna kommune til Sande når dei skal på arbeid, så er det 376 sandssokningar som reiser på arbeid i andre kommunar.

Nabokommunen Vanylven er i ein anna situasjon. 168 personar pendlar utanfrå til arbeidsplassar i Vanylven, medan 393 vanylvingar pendlar til arbeid i andre kommunar.

Til Herøy pendlar det 732 personar, medan 1.107 herøyværingar reiser på jobb til andre kommunar.

Ulstein er åleine på Ytre søre med mest innpendling (1.809 mot 1.499). Til Hareid kjem det 717 personar «utanfrå» på jobb, medan 1.210 frå Hareid pendlar til jobb i andre kommunar.

Pendling mellom kommunar

Ein skulle kanskje tru at det var langt fleire sandssokningar som pendlar til jobb i Herøy, enn omvendt. Men tala syner ein trend som har vore der i fleire år, nemleg at det reiser på jobb om lag like mange herøyværingar til Sande, som der reiser sandssokningar til Herøy for å tene til livsopphaldet.

Tala syner at 108 herøyværingar pendlar til Sande, medan 117 sandssokningar pendlar til Herøy.

Av dei pendlande herøyværingane reiser flest til Ulstein (447), medan Sande er nummer to med 108 og Hareid deretter med 95. 80 herøyværingar pendlar til Ålesund, medan 69 reiser på jobb til Volda.

Pendlande sandssokningar reiser først og fremst til desse kommunane: Herøy (117), Ulstein (91), Volda (31), Hareid (26) og Ålesund (23).

Av dei som pendlar til Herøy, er desse kommunane største leverandørane av arbeidskraft: Ulstein (272), Sande (117) og Hareid (83). Sande «tek imot» arbeidsfolk frå Herøy (108), Ulstein (87), Vanylven (38).

Ei svakheit med statistikken

Fylkesplansjef Ole Helge Haugen seier til Vestlandsnytt statistikken, som er basert på tal frå Statistisk sentralbyrå, framleis ikkje tek høgde for sjøfolk utanfor nærskipsfart.

– Vi meiner det er naturleg at slike arbeidstakarar vert registrerte på heimkommunen til reiarlaga. SSB ser denne utfordringa, men det er framleis utanfor statistikken. For ein kommune som Herøy ville nok statistikken difor ha fått nokre merkbare utslag, seier Haugen.