– Det er veldig gledeleg at fylkeskommunen no stiller opp med halvannan million. Eg trur også at kommunen og andre som er med på dette spleiselaget, vert med med sin del.
Det seier Tine Storøy (H). Ho var tidlegare denne veka med på det samrøystes vedtaket i fylkeskommunen sitt kultur- og folkehelseutval. Dermed er ein komen langt på veg med arbeidet som skal resultere i eit kombinert naust og formidlingsbygg for jekta.
– Jekta stod ei stund til forfalls. No er Anna Olava godt teken vare på. Med eit bygg som sikrar jekta si framtid vil vi her få eit unikt kulturobjekt som kan brukast i mange samanhengar, seier Storøy til Vestlandsnytt.
Løyvinga fordeler seg med 750.000 kr i 2018, og deretter 250.000 kroner for kvart av åra 2019, 2020 og 2021.
Eit vilkår er at tiltaket vert finansiert i tråd med søknaden. Eit anna er at det vert oppnådd semje i byggjesaka. Vidare er det hekta på eit punkt om at Herøy kystmuseum og Herøy kommune solidarisk skal betale tilbake utbetalt tilskot, viss kystmuséet går ut av Sunnmøre Museum etter at prosjektet er realisert, og utan at slik utmelding er godkjend av fylkeskommunen. Budsjettet er på vel 5 mill. kr, der Herøy kommune skal reise vel 2 mill., kr, Sunnmøre Museum 0,4 mill. kr, og bedrifter/sponsorar 1,2 mill. kr.
– Sunnmørsjekta hadde ein svært viktig funksjon for lokalsamfunnet på Sunnmøre frå mellomalderen, fram mot år 1900. Som rekonstruert fartøy, er «Anna Olava» viktig i formidlinga av korleis ei slik jekt såg ut. Fartøyet har ikkje høg materiell verdi, men heller ein høg formidlingsverdi. Fartøyet må reknast som svært unikt, og bør sikrast mot forfall, heiter det i fylkeskultursjefen sine vurderingar.
Det er peika ut ei høveleg nausttomt i nærleiken av Herøy kystmuseum.