Fjord1, med Sævik-familien som hovudaksjonær, har hala i land nok ein viktig ferjekontrakt, denne gongen på dei fire ferjesambanda Sølsnes-Åfarnes, Molde-Sekken, Solholmen-Mordalsvågen og Aukra Hollingsholm. Kontraktssummen er på 2.260 millionar kroner, melder fylkeskommunen i ei pressemelding.
Miljøferjer
Kontrakten medfører ein omfattande reduksjon av Co2-utslepp, bruk av fossilt drivstoff og samla sett lågare energibruk.
Kontrakten betyr at det frå 2024 vil bli fasa inn elektriske plug-in-ferjer på sambanda Sølsnes-Åfarnes og Aukra-Hollingsholm. På sambandet Sølsnes-Åfarnes er det krav om to nye ferjer.
Startar opp i 2020
Den nye kontrakten startar opp 1. januar 2020 for sambanda Molde-Sekken, Solholmen-Mordalsvågen og Aukra-Hollingsholm. Sambandet Sølsnes-Åfarnes startar opp to år seinare. Reiarlaget kan bruke overgangsmateriell på Sølsnes-Åfarnes og Aukra-Hollingsholm fram til dei nye ferjene skal fasast inn. Det blir nye kaianlegg på sambandet Sølsnes-Åfarnes frå 2024.
God konkurranse
-Det har vore god konkurranse onm oppdraget, og vi er glade for å redusere miljøutsleppa frå ferjene i Romsdal, seier samferdselssjef Arild Fuglseth.
Sjølv med god konkurranse aukar utgiftene til fylkeskommunen. Oppgraderinga av kaianlegg og infrastruktur til miljøferjer vil bety ein betydeleg meirkostnad for fylkeskommunen.