– På programmet står verk av Bach

Skrive av Ines Vatne

Denne veka kjem Kolbein Haga til Sande kyrkje og skal gjeste orgelsommaren i Sande. På programmet står det verk av Bach.

Kolbein har vakse opp på Sandsøya og er sonen til Finnleif Haga som var prest i Sande før i tida. Han er fødd i Stavanger og er utdanna kantor og organist med Bjørn Boysen som orgellærar ved Norges musikkhøyskole, Oslo. Seinare med Finn Viderø, som dansk statsstipendiat i solistisk orgelspel.

Studia vart avslutta med solistdebutar i København og Oslo hausten 1976. Seinare gjennomførte han improvisasjonsstudie med Johannes Ernst Köhler ved Hochschule für Musik i Weimar.

Kantor i 25 år

Han har vore kantor og organist i Den norske kyrkja i 25 år og har vore fyrsteamanuensis i orgel- og kyrkjemusikk. Han var medansvarleg for kyrkjemusikkutdanninga ved Universitetet i Stavanger/Musikkonservatoriet i 20 år.

Kolbein Haga har spela konsertar, gjort plateinnspelingar og hatt radiotransmisjonar i Norden, Baltikum, Sveits, Nederland, Storbritannia og Tyskland.

Som utøver har han profilert seg som tolkar av eldre musikk med vekt på den nordtyske orgelbarokken og Bach, samt nordiske komponistar frå våre århundre.

I 1985 framførte han Bachs samla originalverk for orgel over femten konsertar i St. Petri kyrkje i Stavanger. Han har hatt ei lang rekkje oppdrag som orgelkonsulent og var også med og fekk på plass Jehmlich-orgelet i Sande kyrkje på 80-talet.

Vi gler oss til å kunne ta imot Haga på Sandsøya denne veka og få høyre han spele Bach på det fine orgelet i Sande kyrkje. Kyrkjeringen vil også vere på plass og ta imot publikum med bevertning i våpenhuset før og etter konserten.