Det seier Pernille Riise Eidem (17) i årets russestyre ved Herøy vidaregåande skule.
Tysdag 12. mars og onsdag 13. mars går dei fleste av dei totalt 33 russane ved skulen med bøsser rundt omkring i Herøy.
– Vi skal ha ei runde i Gursken også, seier Margrete Warholm (17), som også sit i russestyret.
Dette støttar dei
Det er to år sidan sist herøyruss gjekk for Krafttak mot kreft. Elles har det vore tradisjon i mange år.
– I år er det kanskje ekstra viktig, ettersom pengane går til forsking på krefttypar som få overlever, seier russepresident Simon Voldsund (18).
Ifølgje Kreftforeningen er lungekreft og bukspyttkjertelkreft er mellom desse. I dag overlever to av ti lungekreft og færre enn éin av ti overlever bukspyttkjertelkreft.
Pengane går også til gode omsorgstilbod for pasientar og pårørande.
– Dei fleste av oss er kjekke
Russegjengen, som er ei samansetting av yrkesfagelevar ved Vg2 og elevar som går Påbygg til studiekompetanse (Vg3), er sjølvsagt med på Krafttak mot kreft fordi dei støtter saka. Men dei håper samtidig at initiativet bidreg til at folk får eit godt inntrykk av dei.
– Det er ikkje til å leggje skjul på at russen har fått eit litt dårleg rykte. Når folk høyrer at russ har gjort noko gale, er det lett å dra alle over ein kam og seie at russ er dritungar. Men slik er det ikkje i det heile tatt. Dei fleste av oss er ein kjekk gjeng, og det er synd at enkelte skal øydelegge den oppfatninga, seier Voldsund.
Så smiler han og legg spøkefullt til:
– Vi startar med å byggje oss opp, så vi kan bruke resten av tida på å bryte oss ned.
Samarbeider med politiet
I år som før har russen god dialog med politiet.
– Vi veit kven dei er og dei veit kven vi er. Russestyret hadde møte med ein i politiet, og dei har fått ei liste med alle russegruppene og kontaktperson på kvar gruppe. Vi seier ifrå til dei kvar gong vi skal ha eit arrangement og let dei vite kven som skal vere der, seier Voldsund.