No må politikarane vakne og hjelpe meg

Sande kommune har regulert å ta 270 kvadratmeter av eigedomen min for å regulere inn ny fylkesveg og gangveg heilt inn til mi garasje. På teknisk etat har mine papir til stadigheit forsvunne og ikkje kome fram til politikarane, så det siste året har eg sjølv vore nøydd til å sende alle mine papir til formannskapet og av og til til kommunestyret for at politikarane skal vite kva som foregår. Eg har tigga om hjelp, bedt på mine kne, grine, ropt og skrike, eg har blitt utskjellt og fått permar smelt i bordet rett foran meg med beskjed om at vedkomande nektar å vere sekretær for meg, at vedkomande nektar å hjelpe meg med å dokumentere kvar papira mine ligg lagra slik at politikarane kan finne dei, eg har fått brølt i fjeset på meg at «det må du ta med fylket, det er dei som skal voldta tomta di», eg har blitt nekta tilgang til Sande rådhus, eg har kjempa for å bli høyrt: Eg har rettigheiter eg også!! Min protest på referatet i grunntingingsutvalet har no blitt «skjerma» frå offentlegheita inntil forhandlingane er over. Eg har mista nattesøvnen, eg greier knapt å ete, eg går kvalm til ei kvar tid, og mange veit at eg er kronisk sjuk, ofte med enorme smerte, noko som gjer at eg med denne uhaldbare situasjonen Sande kommune har sett meg i no har ekstremsmerter mykje oftare enn på det jamne.

Eg har i mange år kjempa ein knallhard kamp for å behalde mine rettigheiter i ei sak der Sande kommune vil ta 270 kvadratmeter av eigedomen min mot skulekrysset for å bygge ny fylkesveg og nytt gangfelt heilt inn til garasja mi, slik at den ikkje lenger kan brukast som garasje. Eg har tigga om hjelp frå kommuna, eg har frå første dag bedt om at Sande kommune måtte ta kontakt med fylket for å avklare kva for rettigheiter eg har og kva fylket vil bidra med om det nokon gong skal byggast ny fylkesveg og nytt gangfelt. For meg er det likgyldig kven av Sande kommune og fylket som sørger for at eg får makebyte, ny dobbelt garasje, nye oppstillingsplassar til bilar, dekt tap av reduksjon i eigedomsverdi mm., men ansvaret må avklarast slik at eg får klarheit i kven som skal erstatte kva, slik at eg får tryggheit i åra framover. Kåre Gjengedal har sagt til Sande kommune at dei må sørg for å  behandle alt som gjeld min eigedom samtidig, slik at eg får vite kva eg mistar og kva eg får i erstatning. Det har Sande kommune ikkje gjort under vegs, men eit lite glimt no på slutten. Eg fikk halde eit innlegg på 30 minutt den 14.3.23 då formannskapet var samla til møte og synfaring. Fleire politikarar sa etter mitt innlegg at dei i løpet av dette møtet hadde fått vite meir om saka enn alle dei åra saka har pågått. Mange politikar sa at dette var veldig mykje nye opplysningar på ein gong og at saka burde utsettast. Teknisk etat hevdar at dei heile tida har gitt meg informasjon og eg har fått møter med kommuna, men dei må tenke på kor mange gongar dei har endra planane slik at det har påvirka meg!

Det vart vedteke av kommunestyret den 21.3.23 at «Støyskjermen langs fylkesvegen mot gnr86 bnr9 vert å legge inn på plankartet og føresegner slik den var foreslått etter 1 gongs høyring av Larsnes sentrumsplanen. Kommunestyret ber administrasjonen og politisk leiing ta omsyn til eigedomen 86/9 i samband med gjennomføring av reguleringplan, slik at ein finn gode løysingar med makebytte og tilrettelegging som så langt råd er kan kompensere for ulemper vi påfører eigaren.»

Alle i formanskapet og kommunestyrepolitikarane som var med på synfaring på min eigedom den 21.3.23 før vedtaket, veit kva del av BKS9 eg vil ha makebyte på for å få ny erstatningsdobbeltgarasje sett opp for å skjerme mot innsyn frå nye bygg på BKS9, sjølvsagt på flata på nedsida av SKV20. Mitt makebyteareal kan sjølvsagt ikkje brukast til vegen SKV20, så det må takast høgde for kvar vegen skal leggast når mine 270 kvadratmeter makebyteareal skal plasserast på BKS9.

I det nye plankartet er leikeplassen og grøntarealet som var teikna inn mellom min eigedom og BKS9 teke vekk. Sande kommune og Norconsult har overfor meg hevda at eg ikkje kunne få makebyte der fordi grøntareale og leikeplassar ikkje kan takast vekk frå plankart, likevel er dei no flytta. Eg har frykta at Rune Slettestøl vil få det som han vil med teknisk etat, og eg ber derfor alle politikarane no lese Rune Slettestøl sine brev til Sande kommune datert 8.2.23 og 18.05.23, om dokke slit med å finne breva på postlista er det Areal & Plan AS som har sendt dei inn. No må politikarane sette seg inn i saka grundig og hjelpe meg som allereie bur her og skal fortsette å bu her, med å få ta vare på mine rettigheiter! Rune Slettestøl vil at SKV 20 skal byggast raskt, han vil ha makebyte vest for SKV20 på BKS9, altså også inkludert det arealet eg skal ha, og han vil straks starte planlegging av utbygging. Eg går ut frå at det då vert minimum 12 bueiningar sidan han med den tomta han eig foreløpig har nemnt 8 leiligheiter når eg har spurt han. Politikarane må i tillegg til å sikre meg 270 kvadratmeter på BKS9, sikre at Rune Slettestøl ikkje får dispensasjon til større utnyttelsesgrad av tomta enn 40% slik det er regulert.

I sitt brev 18.5.23 skriv Rune Slettestøl: «For ordens skyld gjør vi også oppmerksom på at Slettestøl ikke ønsker å avgi grunn til gnr 86. bnr.9, verken direkte eller via Sande kommune.»  «..dessuten at arealer regulert til konsentrert småhusbebyggelse overføres som tilleggsareal til en privat eneboligeiendom, hvilket ikke vil være i samsvar med reguleringsplanen som nylig er vedtatt». Dette fell på si eiga urimeligheit, for alle i formannskapet og alle i kommunestyret som var på dei to møta 14.3.23 og 21.3.23 veit at eg var lovd makebyte på desse møta og det er til og med skrive inn i vedtaket!

Grunntingingsutvalet lovde meg i møte 22.5.23 å gå i dialog med Rune Slettestøl om makebyteareale, men i skrivande stund kan ikkje grunntingingsutvalet opplyse meg om utviklinga i saka. Eg kan derfor berre håpe at Rune Slettestøl vil vere så snill at han går med på mine ønske.

No må politikarane vakne og hjelpe meg slik at eg får arealet på 270 kvadratmeter på BKS9. Fylket, ved Sandra Alnes, seier at det beste for både Sande kommune og meg vil vere at eg no med ein gong får kjøpe dette arealet på 270 kvadratmeter på BKS9, samtidig som eg beheld eigedomsretten min mot skulekrysset inntil det er bestemt om fylket i det heile kjem til å bygge ny fylkesveg og nytt gangfelt. I flg. Sandra Alnes ligg ikkje endringar på min eigedom på fylket sin plan fram til 2031 og det er ikkje sikkert at fylket i det heile kjem til å bygge slik det er regulert. Det er derfor etter hennar meining best at eg beheld eigedomsretten til min eigedom i skulekrysset. Fylket ved Johnny Loen skriv i brev til meg om reguleringsplanen for Larsnes sentrum: «Planen er med andre ord et dokument som sikrar at vegar blir rett bygde dersom dei skal endrast no eller seinare. Planen kan ikkje pålegge fylkeskommunen å bygge veg.»  Eg er villig til å kjøpe dette arealet på 270 kvadratmeter slik fylket ved Sandra Alnes meiner er det beste. Då kan Sande kommune gjere det dei vil med resten av BKS9, berre dei passar på at SKV20 får mindre bratt stigning enn 10%

Med desperat bøn om hjelp frå politikarane i Sande kommune,

Ruth Synnøve Hammer Rekdal

Olav Myklebust - ordførar i Sande. Foto: Geir Egil Eiksund

Tilsvar frå ordførar Olav Myklebust:

Kva kan ein kommune gjere – og ikkje gjere ...?

Ruth Synnøve Hammer Rekdal har på trykk eit lengre lesarinnlegg i fredagsutgåva av Vestlandsnytt – der ho svært så direkte gjev uttrykk for sine eigne synspunkt i ei reguleringssak. Som kommune kan vi ikkje drive sakshandsamling i pressa – og derfor vil vi avstå frå vidare polemikk i denne saka. Nokre av påstandane som kjem fram er derimot av ein slik karakter at dei ikkje bør stå uimotsagde – men dette blir altså mitt første og siste avisinnlegg i denne saka!

Innleiingsvis har Hammer Rekdal ei utgreiing om korleis ho føler seg motteken av kommunen. Eg skal ikkje kommentere dette ytterlegare – dette er basert på subjektive kjensler, og stemmer nok ikkje overeins med korleis situasjonane har vore oppfatta på kommunehuset.

Vedtaket som vart gjort i denne saka (PS 22/23) 21. mars har følgjande ordlyd:

1. Sande kommune godkjenner den framlagde detaljreguleringsplan for Larsnes sentrum, planID 20200001 med følgjande juridiske plandokument:

· Plankart datert 04.02.2023

· Reguleringsføresegner sist revidert 14.2.2023

Støyskjerm langs fylkesvegen mot gnr 86 bnr 9 vert å legge inn på plankartet og føresegner slik den var foreslått etter 1. gongs høyring av Larsnes sentrumsplanen.

2. Kommunestyret ber administrasjonen og politisk leiing ta omsyn til eigedomen 86/9 i samband med gjennomføring av reguleringsplan, slik at ein finn gode løysingar med makebytte og tilrettelegging som så langt råd er kan kompensere for ulemper vi påfører eigaren.

Vedtaket var samrøystes etter at eit utsettingsframlegg fall mot 8 røyster.

Grunntingingsutvalet (ordførar og planleggar) har så starta opp arbeidet med å følgje opp vedtaket frå kommunestyret. Det er heilt normal prosedyre at dokument frå pågåande forhandlingar blir unnateke offentlegheit fram til forhandlingane er sluttførte. Dermed vil også innspel som direkte viser til t.d. møtereferat automatisk bli skjerma.

Så til sjølve saka: Hammer Rekdal har ytra ønskje om eit areal sør for eigedomen sin. Kommunen har som utgangspunkt tilbydd erstatningsareal både sør og aust for eigedomen – der kommunen har eigedomsretten i dag. Det er svært krevjande når Hammer Rekdal har ønskje om areal som tilhøyrer tredjepart! Som kommune kan vi sjølvsagt ikkje gjere vedtak der vi inkluderer annan manns eigedom i eit makebytte – det må i såfall baserast på frivilligheit frå tredjepart.

Det er heller ikkje slik at kommunen til ei kvar tid kan gå inn og legge føringar for utnytting av ein eigedom som er i privat eige. Dette blir gjort av fagfolka våre etter eige regelverk i samband med byggesøknad.

Til slutt er det heilt rett at fylkeskommunen som vegeigar og tiltakshavar er den som avgjer realisering av ei omlegging av fylkesvegen i henhold til reguleringsplanen som ligg føre.

Det blir svært uryddig av Sande kommune dersom vi skulle påta oss meir ansvar enn det vi har utifrå vedtaket i kommunestyret. Vi har forplikta oss til å finne løysingar «så langt råd er» - men det krev at begge partar innser kva føresetnader som ligg til grunn for forhandlingane!

Olav Myklebust, ordførar