(Dette lesarinnlegget vart ikkje med i fredagens papiravis. Det vert difor publisert på nett. Red.)

Kjære veljarar.

Nok ein gong stiller Sande Høgre til val med ei sterk valliste med 27 samfunnsengasjerte kandidatar frå alle krinsar i kommunen. Sjølv er eg stolt og audmjuk over å få fronte Høgrelista som ordførarkandidat. Vi meiner å ha gjort gode førebuingar framfor eit nytt val. Gjennom vinter/vår 2023 har vi invitert oss sjølve ut i krinsane til møter med næringsliv, foreiningar og opne folkemøter i alle bygdene. Vi har fått mange gode og viktige innspel frå dei som veit kvar skoen trykker.  Innspela har vi rubrisert etter tema/tiltak og vi vil gjere nytta av desse i det politiske arbeidet framover. Og gjennom valkampinnspurten siste månaden har vi igjen oppdatert oss på det som innbyggarane er opptekne av. I møte med folk på på val-stander, husbesøk m.m.. I slike møter tek vi mål av oss til å lytte minst like myke som vi prater.

Sande-samfunnet har mange utfordringar, men først og fremst fantastiske moglegheiter. Vi har eit omfattande og sterkt næringsliv som satsar stort i alle bygdene våre. Sande skal vere JA-kommune som legg til rette for rekruttering og busetjing. Næringslivet vårt er nøkkelen for å sikre og auke busetnaden. Noko som bokstaveleg tala vil gi meir liv i bygdene, som igjen vil auke kommunen sine inntekter i form av rammetilskot og skatteinntekter. Til dette krevst prioritering av planverk for satsing på attraktive byggeklare tomter i alle bygder.  Oppføring av fleire gjennomgangsbustader som vi hadde suksess gjennom 2010-talet. Barnehagar med moglegheit for fortløpande opptak. I rekrutteringssamanheng vil vi innføre ei ordning med å dekke kr 30 000 av studiegjelda til nyetablererar.

Vi skal spele på lag med alle gode krefter; offentlege som private, kultur- og idrettsrørsla og andre frivillige lag og organisasjonar, for å skape bulyst og framtidstru i heile kommunen.

Betre samferdselsløysingar står sjølvsagt høgt på vår politiske agenda. Vi skal stå hardt på for heilsårsordning med timesavgangar for ferge fram til Safast er realisert. Vi vil også engasjere oss for eit betre samordna rutenett for ferge, båt, buss og drosje. Vi trur det er mogleg å oppnå langt betre mobilitet i-, og til/frå Sande med samordning av rutenettet. Trafikktrygging er også viktig tema. Gangveg Vik – Sætre, Hallekrysset, nedsett fartsgrense Hide-Hageselle for å nemne nokre aktuelle tiltak.

Vi har målsetjing om å vere best for eldre. Vi skal følgje opp kvalitetsreforma Leve heile livet som handlar om mat, aktivitet og fellesskap, helsehjelp og samanheng i tenestene. Fleire eldre betyr i det store bildet betre helse- og høgre levealder. Høgre meiner at samfunnet må legge til rette for at det skal vere mogleg for eldre å bu heime så lenge dei ønskjer og få den hjelpa dei treng heim til seg.  Mange kommuner gjer små eller større endringar i måten å arbeide på.  Det kan vere meir varierte buformer, tilrettelagde bustader som gjer det mogleg å bu lenger i sitt miljø.  Det kan vere turnusordningar for helse- og omsorgspersonell som resulterer i mindre sjukefråver, m.m. Vi sit ikkje på svara, men trur på viktigheita av dialog og samhandling med brukarar og tilsette. Vil vil leite etter fakta og kunnskap internt og eksternt for å utvikle dei beste løysingane i lag.

Økonomisk kontroll og styring ligge må i botn for alt vi vil. Vi må finne dei beste tenestene for våre innbyggarar innanfor økonomiske rammer.

Godt val!

Dag Vaagen – ordførarkandidat for Sande Høgre