Larsnes/Gursken-spelarane har fått med seg at Sunnmørsposten med fleire tippar dei på nedrykksplass før årets sesong i 4. divisjon.

– Det er noko vi kan bruke som motivasjon. For vi er fullt på høgde med dei andre laga, seier spelarane.

Det er ei oppfatning den nye hovudtrenaren deler. For etter fleire år som spelande hovudtrenar har Anders Vaagen gitt frå seg trenaransvaret for Larsnes/Gursken til ein annan Anders, herøyværingen Anders Helsem Hoff. Han vil vere mannen som tek LGFK oppover tabellen.

– Eg trur ikkje vi står så mykje tilbake for Bergsøy og dei andre laga i toppen. Vi har eit bra lag her, og klarar vi å sikre oss nokre nye spelarar, samt behalde dei spelarane vi har her også etter sommaren, kan vi klare øvre halvdel, seier Helsem Hoff.

Trivast i LGFK

Helsem Hoff har fortid i nettopp naboklubben Bergsøy. Der har han vore omtrent heile livet sitt, og han har mellom anna vore trenar for Bergsøy G16 og assistenttrenar for A-laget i fleire år. Men i desember i fjor valde han å takke ja til hovudtrenarjobben i LGFK.

– Det er veldig trivelege folk i LGFK, og det er ein flott klubb å vere trenar for, seier Hoff.

– Korleis er det å vere hovudtrenar?

– Eg føler det har gått fint. Men du får høyre med spelarane kva dei tenker. Kan jo vere dei er skikkeleg misfornøgde, seier Helsem Hoff og ler.

– Han klarer seg fint, og han har tilført oss ein del nytt. Eg trur vi er på rett veg, kommenterer Bjørn Vikanes.

Ujamn sesongoppkøyring

LGFK har variert i prestasjonane i oppkøyringa. Det har blitt uavgjort mot både Tornado Måløy, Vanylven og Hasundgot, siger mot Giske og Hareid, og storsiger over Åmdal IL. Med unntak av Tornado Måløy og Hareid, spelar alle motstandarane på eit lågare nivå. Men det er samtidig verdt å merke seg at LGFK ikkje har tapt ein einaste kamp.

– Det er vanskeleg å tolke så mykje ut av treningskampane. Alle lag varierer ein del i prestasjonane før sesongstart, seier trenaren.

– Det einaste som betyr noko er å vere klar torsdag 25. april?

– Det er heilt korrekt. Det er då vi skal vise kva vi kan, fortel ein optimistisk Anders Helsem Hoff.

Har forsterka laget

Helsem Hoff meiner det er god grunn til optimisme, og at dei seinaste nyhendene rundt klubben forsterkar den påstanden.

– Dei lagoppstillingane vi har hatt i treningskampane er ikkje nødvendigvis representative for korleis vi kjem til å spele når sesongen byrjar. Mellom anna har vi fått inn nokre nye spelarar.

Han snakkar då om signeringa av spissen Gustav Dimmen, som førre sesong spelte for Hødd 2 i 3. divisjon. Og ikkje minst den seinaste forsterkinga, Steffen Moltu frå Hødd.

– Steffen har frå dag ein imponert meg med sine haldningar og tilnærming til fotballen. Han held framleis eit svært høgt nivå, og er ei fantastisk signering for klubben. Ikkje berre med sine ferdigheiter som fotballspelar, men kanskje enda meir for sine ferdigheiter som person. Han er ein naturleg leiar, og ein fantastisk inspirasjon for alle på laget, sa Helsem Hoff då LGFK henta inn Moltu, som har over 300 kampar for Hødd.

Avslutningsvis ber vi herøyværingen om å kome med sitt tips om kvar vi kan forvente å finne Sande sitt fotballflaggskip denne sesongen.

– Vi skal kjempe rundt midten av tabellen, smiler den nye sjefen på River Plate.