Lokalt har det vore knytt ein del spenning til korvidt Sparebank 1 Søre Sunnmøre, som har kontor mellom anna i Fosnavåg, vil vedta fusjonsplanane. Men no er det altså klart at intensjonsavtalen frå i sommar vert vidareført til ein fusjon.
I følgje Sunnmørsposten stemte 15 for fusjonen under Sparebank 1 Søre Sunnmøre si generalforsamling, medan fem stemte imot. Fusjonen kunne gjennomførast om saka fekk to tredjedelar fleirtal. Minst sju medlemer måtte soleis røyste nei om resultatet skulle ha blitt annleis. Behandlinga av saka gjekk for lukka dører.
– Det er inga bekymring
– Representantskapet og generalforsamlinga i høvesvis SpareBank 1 SMN og SpareBank 1 Søre Sunnmøre har i møte den 9. november 2022 gitt tilslutning til at bankane blir slått saman ved at eigedelar, rettar og forpliktingar i SpareBank 1 Søre Sunnmøre blir overdregne til SpareBank 1 SMN, heitte det i ei børsmelding onsdag kveld.
SpareBank 1 SMN vil som vederlag for den verksemda som blir overtatt, utferde eigenkapitalbevis til eksisterande eigenkapitalbeviseigarar i SpareBank 1 Søre Sunnmøre og til Sparebankstiftinga Søre Sunnmøre som vil bli oppretta i samband med gjennomføring av samanslåinga.
I høve samanslåinga skal Tronsheims-baserte Sparebank 1 SMN auke eigenandelskapitalen med over 287 millionar kroner, ved utferdig av over 14 millionar nye eigenkapitalbevis, kvart av dei pålydande 20 kroner.
– Teikningskursen skal samsvare med siste berekna bokførte verdi per eigenkapitalbevis på konsernnivå på det tidspunktet styret i SpareBank 1 SMN vedtek gjennomføring av samanslåinga, heiter det i høve fusjonsvedtaket.
Samanslåinga er framleis vilkårsbunden av nødvendige godkjenningar frå myndigheiter og kontraktspartar på akseptable vilkår. Planen er å gjennomføre fusjonen i andre kvartal neste år.