– Vi er i alle fall kjempestolt. Dette fortel meg at vi har klart å etablere ei betydeleg reiselivsverksemd i kommunen, eit tilbod som folk kjem for å besøke, og det skal vi vere takksame for, seier Sortehaug. Han leitar litt i papira på skrivebordet sitt og finn fram ei lita papirblekke.

Det er besøksstatistikken for juli. Skal ein skilte med slike tal skal det ikkje berre badeglade herøyværingar til. Og riktig nok, poenget hans er godt leseleg i statistikken.

– I turistsesongen har folk frå Ålesund utgjort 19 prosent av våre badegjestar, og dei er vår største kundegruppe geografisk sett. Deretter har vi faktisk Oslo som står for 16 prosent av besøkstalet. Herøy står for 7 prosent, forklarar Sortehaug, medan han går over statistikken.

– No er dette rett nok for turistsesongen, men poenget mitt er det same. Folk reiser langvegs for å kome hit. Majoriteten av våre kundar er tilreisande.

Marknadsføringa fungerer

Noko anna som kan sjåast av statistikken er at strategien dei har kring marknadsføring ser ut til å fungere.

– Vi brukar mykje tid på å kartlegge og analysere kundegruppa vår, kvar dei kjem frå, med meir. Dette har gjort oss i stand til marknadsføre oss og drive målretta kampanjar der vi ser potensialet er størst. Og desse ser vi fungerer.

– No framover planlegg vi også å satse endå meir mot videoinnhald, då vi ser at dette slår bra an. Til jul skal vi til dømes sleppe ein eigen julefilm, seier Karl Petter om den vidare satsinga.

– Barna bestemmer

«Badekalle» trur elles at grunnen til at folk kjem tilreisande er samansett, og at fleire av badegjestane naturlegvis er på jakt etter meir enn berre badinga. Men når det er sagt, er han ikkje redd for å seie at Sunnmørsbadet er ein viktig faktor i reknestykket.

– Det er klart. Vår målgruppe er 6-7-åringane. Når det er ferietid og familien skal peike seg ut eit feriemål er det ikkje tvil i kven som er sjefen. Dei vaksne skal sjølvsagt få ei god oppleving, men det er fyrst og fremst barna vi verkeleg skal blidgjere. Det er dei som styrer lommeboka i fleire tilfelle, smiler han.

– På same måte som med Lego hadde ikkje Sunnmørsbadet vore ein suksess utan barna, legg han til.

Godt samarbeid

Ein annan faktor som har vore heilt essensielt for å tiltrekke seg badegjestane er samarbeidet med Thon Hotel,

– Som eg har sagt tidlegare, suksessoppskrifta for å lukkast i reiselivet her ute er samarbeid. Vårt samarbeid med Thon Hotel er eit klart eksempel på dette. Vi må tilby folk pakkar, og endå viktigare vi må kunne stole på kvarandre og ha gjensidig respekt. Dette er utruleg viktig, og noko vi får god til saman med hotellet.

Ønskjer feiring

Økonomisk sett gjer Sunnmørsbadet det greitt. Den langsiktige gjelda deira har gått ned frå 63,2 mill. i 2015 til 39,7 mill. kroner i 2018 og har minka med 3–4 mill. kroner kvart år. Det er ikkje til å legge skjul på at det er tøff konkurranse ifrå Ulsteinvik. Driftsinntektene ligg på 11,2 mill. og resultatet før skatt er på minus 1,7 millionar kroner. Sortehaug meiner likevel at rekneskapen ville ha sett bra ut om ikkje det var for avskrivingane som selskapet må ta og lånegjelda.

– Eg trur 2019 blir eit godt år og eg er optimist, seier Sortehaug, som no seier han ønskjer å feire at dei har passert 400.000 besøkande.

– Vi har ikkje feira oss sjølve ved verken 200.000 eller 300.000, derfor tenkte vi å slå eit lite slag denne hausten. Vi planlegg no ei feiring med kampanje for våre gjestar så snart turistsesongen har stilna.