– Vi er overvelda og takksame for alle sin innsats, glade for at vi også denne gongen landa med beina på bakken. Det er litt spesielt å få i land noko slikt, der nesten all førebuing skjer i løpet av ei veke før spelet, seier Korsnes.
"Magisk eventyr på Kongsvollen"
Sjå vår store bildeserie frå Kong Arthurspelet
Han kan også fortelje at publikum sine tilbakemeldingar er veldig gode.
– Ta noko slikt som sauene, dei aller minste skodespelarane. Eg hadde sjølv eit barnebarn som såg spelet, og det var sauene som stal det meste av merksemda hennar. Sauene sjølve storkosa seg, og foreldra deira seier dei har fått ei alle tiders oppleving. Ikkje berre med sjølve framføringane, men også med alt det andre som skjer rundt det heile.
– Det er også eit veldig godt bakspel, altså utanom sjølve hovudrollene, representert ikkje minst med dei flinke unge skodespelarane som er gardsfolka, legg han til.
Laurdagens første førestilling, med kanskje så mange som 900 tilskodarar, sikra åleine gode publikumsinntekter denne gongen.
– Det var fantastisk flott å sjå kor mykje folk som kom. Og så hadde vi nokre hundre også på dei to neste førestillingane, seier styreleiaren.
Han registrerte dessutan med glede at det kom veldig mange tilreisande frå Søre Sunnmøre. Mange har reist utover til øya mane gongar før, og det gir sjølvsagt sjølvtillit for Kong Arthurspelet at folk aldri ser ut til å bli leie av humorspelet på Kongsvollen.
Det kom ei lita utfordring med logistikken like før spelhelga, då passasjerbåten med plass til 200 vart erstatta av ein med plass til vel femti. Men Kong Arthurspelet fekk leigd inn endå ein båt, slik at det gjekk rimeleg bra å få frakta fram og tilbake, utan svært lang ventetid for dei tilreisande.
Mange hadde elles teke turen med båt, nokre også med bubil. Og i hytter og hus var det nokså fullt. Mange tusen tok turen til Sandsøya i helga, der eit lokalt apparat ordna med mat og drikke, og jamvel dans og moro.
– Det fungerte fint, alt saman, meiner Jostein Korsnes.
Suksessen i 2019 gir endå betre motivasjon for neste års spel, i 2020. Då er det 20 år sidan spelet for første gong vart framført, og jubileumshelga neste år blir det slått litt ekstra på stortromma, seier signala.
Fem om spelet
Vi snakka med nokre av dei som såg spelet, og spurde om korleis dei opplevde det.