– Det er framleis vanskelege tider i den maritime marknaden, seier konstituert konsernsjef Øyvind Halkjelsvik etter at rekneskapen er oppgjort med eit minus på 39 millionar kroner i 2018.

Underskotet kom trass i at selskapet sette omsetningsrekord med 1,16 milliardar kroner i samla omsetning. Halkjelsvik forklarar tapet med krevjande prosjekt i den maritime verksemda til selskapet.

– Vi opplever sterkt prispress og kompliserte prosjekt mot nye fartøysegment og kundar. Både prosjekta våre i utlandet og her heime har vore krevjande og meir komplekse enn venta, seier Halkjelsvik.

Aktiviteten innan landbasert installasjon og varehandel skaper gode resultat, og ifylgje Halkjelsvik skal selskapet framover jobbe hardt for å få lønsemd i skipsinnstallasjonsaktiviteten.

– Saman med den kompetansen og erfaringa vi har i organisasjonen gir dette oss eit fundament på vegen vidare, seier han.

Hareid Group består av tretten heil- og deleigde selskap og har om lag 680 tilsette.