Formannskapet i Herøy tok denne veka turen til Sævikane for å gjere seg betre kjend med området der tiltakshavar Axel Bjørklid vil etablere tre bustadar, fire fritidshus for utleige, fire naust og ei badstue. I søknaden legg tiltakshavaren stor vekt på at han vil spele på lag med naturen. Området Bjørklid vil bygge i blir lokalt omtala som «Bakarneset».

Bakgrunnen for at formannskapet såg det nødvendig med ei synfaring er at då dei sist behandla saka fann dei det vanskeleg å avgjere om området vil tole ei så stor utbygging.

Rådmannen har på si side vore positiv til prosjektet, og meiner planane skildrar godt det potensialet som er i området. Men han presiserer at bygging i området er på vilkår, og at forhold til kulturminne må avklarast i planarbeidet.

Serverte sveler

Då formannskapet (og lokalavisa) kom fram til området tysdag ettermiddag, var Bjørklid på plass saman med familie og naboar. Dei stilte også med sveler og kaffi til dei folkevalde. Bjørklid ynskte å nytte høvet til å gi politikarane ei ordentleg innføring i prosjektet.

Ordførar Arnulf Goksøyr gjorde det derimot tidleg klart at dei var komne til området for å få ei orientering frå sin eigen saksbehandlar, utviklingsleiar Ole Magne Rotevatn. Dermed enda det heile i ein situasjon der både Rotevatn og Bjørklid orienterte om planane, sjølv om ordførar Goksøyr gjorde fleire forsøk på å stoppe Bjørklid.

– Ordføraren er knapp

Etter synfaringa delte Bjørklid sine tankar om opplevinga.

– No har eg ikkje mykje erfaring med synfaringar, men eg meiner ordføraren er knapp. Eg trudde dei var interessert i å høyre korleis eg har tenkt å løyse dei utfordringane som er her i området, og få ei betre oversikt over prosjektet. Men det ville ikkje han. Heldigvis var fleire av dei andre politikarane positive, sa Bjørklid i ein kommentar til Vestlandsnytt.

Arnulf Goksøyr er kjend med kritikken frå Bjørklid, men skriv i ein SMS til Vestlandsnytt at han ikkje har fleire kommentarar utover det han svara då Svein Gjelseth kritiserte han under formannskapsmøtet.

– Oppfører oss arrogant

For då formannskapet handsama saka seinare på ettermiddagen, gav Gjelseth (Ap) tydeleg uttrykk for kva han meinte om situasjonen.

– Vi blir teke veldig godt i mot der ute, men så oppfører vi oss arrogant. Det synest eg ikkje vi skal vere. Vi burde teke oss betre tid. Eg meiner vi skal vere imøtekommande og opne for korleis dette kan sjå ut i framtidige planar. No har vi fått ei positivt tilråding frå administrasjonen, og eg synest vi skal halde oss til kommuneplanen. Dette skal vi vere positive til, og vi skal legge til rette for at planarbeidet får kome i gang, meinte Gjelseth.

– Berre orientering frå sakshandsamar

Goksøyr svara Gjelseth kontant.

– Om det er eg som blir oppfatta som arrogant så var eg allereie før avreise klar på at vi berre skulle få ei orientering frå sakshandsamar, noko eg også gav grunneigar beskjed om før start. Eg har vore med på fleire synfaringar, før der innbyggarane står klare …, svara Goksøyr.

– Eg har ikkje snakka med grunneigar, men dette er mi personlege meining. Eg håper vi kan gjere det annleis i framtida, det er noko som heiter folkeskikk også, kontra Gjelseth.

Hugsar du? Goksøyr skulda tidlegare i år administrasjonen i Herøy kommune for å vere arrogante.

Berre Runde røysta mot

Når det gjeld sjølve byggeprosjektet vart det ein lengre diskusjon. Spørsmåla var mange, og fleire gjekk på korleis dette vil påverke den allmenne ferdselsretten i strandsona. Også vegtilkomsten blei diskutert, og Tine Storøy (H) omtala det som sjarmerande trongt i området.

– Men det er veldig positivt. Det ser ut til å vere unge tilflyttarar også, meinte Tine.

Og som varaordførar Camilla Storøy (KrF) påpeika så vil ein få mange anledningar til å stille spørsmål ved ulike utfordringar knytt til prosjektet når prosessen byrjar.

– Her skal vi gi løyve til planarbeid, og dette er eit veldig positivt tiltak som eg ikkje ser noko problem med å seie ja til, sa Storøy.

Ordførar Goksøyr la difor opp til avstemming, men minna om at han sjølv var skeptisk.

– Eg tenker eigentleg at det er betre å seie nei no enn på eit seinare tidspunkt. For her trur eg det vil bli mange nei seinare i prosjektet. Eg veit at sentrale styresmakter ofte har sagt nei til slike blandetiltak, sa ordføraren.

Men ordføraren røysta likevel for tilrådinga i likskap med dei fleste andre. Berre Kjell Runde (Folkelista) var i mot.

– Eg er skeptisk til såpass store inngrep i strandsona, og det må eg få lov til å vere. Der er også naboar, og er ikkje sikker på om alle står opp og klappar så høgt for reguleringsplanen som kjem, sa Runde.