Dessutan er mannen dømd til å betale kvinna 80.000 kroner i oppreisingserstatning. Til frådrag i domen kjem 62 dagar der mannen sat varetektsfengsla.

Det skjer etter at mannen også tidlegare har sona for mishandling av kvinna. Det gjer domen straffeskjerpande.

Mishandling

Ved fleire høve i 2016 og 2017 skal mannen ha mishandla sin tidlegare sambuar ved å utsetje ho for vald, trugslar og andre krenkingar.

I fylgje den nye saka sin tiltale dunka mannen hovudet til kvinna i golvet fleire gongar, i tillegg til at ho vart sparka og slått på kroppen.

Ved eit anna høve kasta mannen i følgje tiltalen eit bord på kvinna, og råka ho i hovudet.

Mannen skal også ha brote seg inn gjennom inngangsdøra til kvinna, som ho hadde stengt ved å slå ei plate framfor døra. Han kom seg likevel inn, slo og/eller skalla ho gjentekne gongar mot kroppen og hovudet. Mannen brukte eit skrujarn som han trykte opp mot øyret hennar, slik at ho blødde, og truga med å stikke skrujarnet inn i auget.

Kvinna vart også lugga så hardt at hårlokkar losna. Bustaden til kvinna vart også rasert. Møblar og TV vart kasta omkring. Dessutan truga mannen med å drepe kvinna.

Slo, stal og truga

Ved eit anna tilfelle, i 2018, skal mannen ha slått ei anna kvinne fleire gongar i ansiktet. Mannen er også tiltala for å ha utøvd vald og truga andre medlemer av eigen familie.

Tiltalen inneheld også eit punkt om grovt tjuveri. Mannen tok seg i mai 2018 inn i ei leilegheit i Herøy og stal ein PC og tablettar.

Eit anna punkt i tiltalen fortel om biltjuveri eller medverknad til biltjuveri. Det skjedde i Volda hausten 2017. Våren 2018 skal mannen ha tileigna seg ein datamaskin i Ulstein som han skal ha visst var stolen. Tiltalen har også to punkt om tjuveri, og desse skal ha skjedd i Ulstein, der han tileigna seg øl frå ein daglegvarebutikk og ein ryggsekk frå ein privatperson.

Retten si vurdering

Retten har kome til at mannen mishandla kvinna, mellom anna ved slag og spark, ved fleire tilfelle både i 2016 og 2017.

Mannen vart i desember 2015 dømd for fem tilsvarande valdsepisodar mot den same kvinna, medan dei to var sambuarar.

– Handlingane er «alvorleg og gjenteken vald» mot den fornærma. Retten viser til at gjenteken dunking av hovudet til den fornærma mot golvet, og slag mot hovudet, er «alvorleg». Skadepotensialet med slag og dunk til ansiktet er stort, og det er gjerne tilfeldigheiter som kan vere avgjerande for skadepotensialet, heiter det i retten si vurdering.

Retten har i bevisvurderinga lagt avgjerande vekt på kvinna si forklaring, som vert omtala som detaljert og truverdig. Også den tiltalte har stadfesta dei fleste av handlingane.

Mannen vart dømd på alle punkt. Det er i formidlande retning at saka har hatt lang behandlingstid, samt at mannen har erkjent straffeskuld. Dei formildande omstenda gjer at fengeslsstraffa er fastsett til fem månader kortare enn kva som ville ha vore vanleg (15 månader i staden for 20).