Då vi etterlyste lokale «youtubarar», fekk vi inn mange tips. Dei aller fleste peika på same person: Theodor Remøy Aurvåg (14), elev ved Ytre Herøy ungdomsskule, som driv YouTube-kanalen «Balladass Games». Der kan abonnentane hans sjå han spele sitt favorittspel, Fortnite, medan han og dei han spelar saman med kommenterer spelet.
– Eg starta YouTube-kanalen for om lag 1,5 år sidan. Det var berre for moro skuld, seier Theodor, som i dag har 200 abonnentar.
Årsaka til at han valde å streame nettopp Fortnite, er enkel:
– Eg byrja å bli god i det, og då er det gøy.
Theodor spelar Fortnite nesten kvar dag, men han har berre delt spelinga på YouTube nokre gongar i månaden. No har han elles ein liten pause.
– Eg orkar ikkje å styre med det akkurat no, seier han.
Tidlegare sendingar ligg elles framleis ute, og det kan fort bli meir i framtida.
– Kva er din favorittkanal utanom din eigen?
– Det er kanskje Randulle. Han spelar FIFA og gjer masse andre morosame ting, seier Theodor.