Som Vestlandsnytt melde for snart to veker sidan, har Bergsøy vore i dialog med Hødd-spissen Magnus Myklebust. No stadfestar Bergsøy-trenar Tommy Malins at Myklebust blir Bergsøy-spelar.

Myklebust var også på plass på tysdagens Bergsøy-trening. Han er glad for at framtida no er avgjort.

– Det blir spennande dette. For meg følast det naturleg å signere for Bergsøy, når eg allereie bur i området, seier Myklebust.

Magnus Myklebust starta karrieren i Gursken, men gjekk til Hødd tidleg. Der imponerte han stort, noko som la grunnlaget for ei innhaldsrik karriere der han spela for både Lillestrøm, Odd og Kongsvinger. Med Lillestrøm blei Myklebust også Norgesmeister.

Han har i tillegg spela for Norge på alle aldersbestemte landslag, og har blant anna fire mål på 16 U21-landskampar. I 2015 returnerte han til Hødd, der han har spela dei siste fire sesongane.

No er det altso Bergsøy og fjerdedivisjon som blir kvardagen for den tidlegare Eliteserie-spissen. Men Myklebust forsikrar om at han er toppmotivert for sin nye fotballkvardag.

– Det einaste eg vil er å spele fotball, og eg har jo spela på alle ulike nivå allereie. Eg gler meg til å spele for Bergsøy, seier Myklebust.

– Ekstremt rutinert spelar

Bergsøy-trenar Tommy Malins er storfornøgd med å ha sikra seg den rutinerte angrepsspelaren.

– Kva kan eg seie? Dette er ei fantastisk signering for oss. Magnus har ein enorm rutine, noko vi vil dra nytte av på så ekstremt mange måtar. Eg har sett han spele for Hødd, og eg har heilt ærleg berre tenkt «wow» han er god, seier Malins tydeleg fornøgd med sin nye angrepsspelar.

Engelskmannen er godt nøgd med utviklinga i spelarstallen, og meiner dei no byrjar å få eit svært godt lag, spesielt i angrep.

– Vi har Roald Runde også. Det er godt mogleg vi kjem til å bruke Magnus i rolla bak spissane i enkelte kampar, seier Malins.

Av angrepsspelarar kan Malins no velje mellom Franjo Tepuric, Magnus Myklebust og Thomas Sætre Hauge. I tillegg vil han etter kvart få Marius Sporstøl og Roald Runde tilbake frå skade, samt at reservekeeper Jakob Nerland har eit meir eller mindre realistisk mål om å prøve seg i angrep denne sesongen.