Rådmann Oddbjørn Indregård tilrår at kommunestyret seier ja til avtalen. Saka skal no opp til politisk behandling. Planen er ei samordning frå komande årsskifte.
Sande har tidlegare vore i drøftingar med Volda, Ørsta, Ulstein og Hareid (som høyrer inn under samarbeidet, med Volda som vertskommune, red. mrk.) når det gjeld samarbeid om barnevern. Seinare møttest administrativ og politisk leiing i Sande og Volda til nye samtalar.
Grønt lys frå Volda
Til saka vert det opplyst at fellesnemnda for nye Volda kommune (med Hornindal) hadde intensjonsavtalen oppe på møte 7. februar i år, og der vart det gitt grønt lys for å ta med Sande i samarbeidet.
Det interkommunale barnevernskontoret Sande etter alt å døme vert med i, har 42 tilsette, med hovudkontor på rådhuset i Volda.
Nav til Hareid, barnevern til Volda
Barnevernstenesta i Sande har 2,4 tilsette, og var fram til førre årsskifte samlokalisert med NAV Sande under felles leiing, – på Sande rådhus. Nav Sande har no blitt Nav Hareid-Ulstein-Sande, med hovudkontor på Hareid.
Rådmannen skriv til saka at alternativet med å drive sitt eige barnevernskontor vidare, som i dag, ikkje har vore aktuelt. Tenesta sjølv har nemleg varsla at kapasiteten må vesentleg aukast både på saksbehandling og tiltak, om det skulle vere aktuelt. Dessutan har myndigheitene pressa på for å sikre det rådmannen omtalar som «ei robust framtidig barnevernsteneste».
I staden melder han at både dei andre i barnevernssamarbeidet, i tillegg til dei tilsette i Sande sjølve, er positive til eit samarbeid med Volda som vertskommune.
– Tverrfagleg arbeid er særs viktig for det einskilde barnet i barnevernstenesta, heiter det mellom anna i rådmannen sine vurderingar.
Møte brukarane lokalt
Konkret er det planen at Volda skal vere vertskommune for barnevernstenesta i Sande. Dessutan skal brukarane i Sande kunne forvente å møte tenesta lokalt i Sande.
Samanslåinga er dessutan – av Fylkesmannen – lovd statlege styrkingsmidlar tilsvarande ei 50 prosent stilling. Dette er ei løyving for 2018.
Herøy er frå før inne i eit samarbeid med Vanylven kommune om barnevernstenester.