Det seier fylkesleiar Linn Therese Sævik om Sande sitt resultat etter åres TV-aksjon.
Sande ligg nemleg som nummer 2 i fylket når det kjem til kva for kommune som har gitt mest pengar til TV-aksjonen per innbyggar. Det totale resultatet for kommunen vart på 203 877 kroner, som utgjer i snitt 80,84 kroner per innbyggar. Det er heile 35,60 kroner meir enn landsgjennomsnittet på 48,58 kroner per innbyggar.
– Sande har hatt full bøssedekning i lang tid, og det er kjempebra. 2.-plass er heilt fantastisk. Eg sende ei melding til Dag Vaagen søndag kveld og gratulerte han med det fantastiske resultatet. Han har all grunn til å vere fornøgd, skryt fylkesleiaren.
På topp 5 av bidragsytarane i Sande finn vi:
1. Larsnes skule (21.482)
2. Sande kommune (10.000)
3. Brimer AS (5000)
4. Larsnes Mek. Verksted AS (5000)
5. Myklebust Verft AS (5000)
Sande hamna på ein 41.-plass i landet, av i alt 423 kommunar.
Bøsse-auke i Herøy
Herøy gjorde det også særs godt, med sine 668 407 (oppdatert 26.10.2018) kroner til årets TV-aksjon. Det er i snitt 69,71 kroner per innbyggar. Summen heldt til ein 5.-plass i fylket, noko Linn Therese regelrett strålar over.
– Eg hadde som mål at vi skulle bli blant topp 5, og det klarte vi akkurat, så eg er veldig glad. Det var ekstra kjekt å sjå det gode bøsseresultatet, som eg faktisk trur er det beste vi har hatt i Herøy på mange år, seier Linn-Therese.
Årets bøsseresultat i Herøy vart på 291 437 kroner, mot 249 636 kroner i fjor.
– Eg er glad for alle som gjekk med bøsse og alle som tok så godt imot dei. Der er stor givarglede i Herøy, både på bøssene, hos kommunen og i næringslivet, seier fylkesleiaren.
På topp 5 av bidragsytarane i Herøy finn vi:
1. Moltu skule (33 343) (Oppdatert 26.10)
2. Bergsøy skule avd. Borga (30.000)
3. Herøy kommune (25.000)
4. Søre Sunnmøre frisørlaug (23.000)
5. Ope hus med konsert – Mindre. Åleine. Saman. 4. okt. (19.020)
6. Leikanger skule (17.998)
På landsbasis hamnar Herøy på 57.-plass (per. 26.10.2018)
Tala henta frå giverstafett.no
Godt fylkesresultat
Då Vestlandsnytt sjekka måndag ettermiddag, var det blitt samla inn totalt 13 003 442 kroner i Møre og Romsdal (7.-plass i landet). Av desse kjem over seks millionar kroner frå bøsseinnsamlinga, som er ein betydeleg auke sidan i fjor. Også kommunebidraga har auka mykje.
– Eg trur dei gode resultata har å gjere med at årets TV-aksjon støttar ei sak som engasjerer mange og som mange kan kjenne seg igjen i, seier fylkesleiaren.
I år går innsamlingsaksjonen til Kirkens Bymisjon sitt arbeid for eit varmare og meir inkluderande samfunn: « Vi skal tilby mennesker som opplever å stå utenfor, et nytt fellesskap, en seng eller en samtale og slik bidra til at flere får muligheten til å oppnå egne mål og drømmer».
Landsresultatet var måndag ettermiddag på 241 276 064 kroner.