– Mange vil vel kanskje seie at det er rart at eg vil ha den offisielle premieren på showet mitt i Fosnavåg, og at eg heller burde hatt fleire oppsettingar i Oslo i staden. Men når eg fyrst er tilbake i Noreg for å turnere, vil eg sjå landet.

Slik innleiar Kristian Valen samtalen, då vi tok ein prat med han om den komande premieren på hans nye show, Åsted Valen. Den verdskjende komikaren og artisten har nemleg valt Fosnavåg konserthus som fyrste turneringspost for hausten. Showet har riktig nok hatt nokre testoppsettingar, men dette er fyrste gongen han viser det ferdig. Det blir såleis startskotet i det han nok ein gong skal ut og fri til det norske folk med sine karakteristiske parodiar, folkelege vitsar og velkjende musikknummer.

Roser sunnmørspublikummet

I tillegg til å ville utforske vårt vidstrakte land, har Valen også ein anna grunn til kvifor han legg premiera til akkurat Sunnmøre. Publikum.

– Eg synest det er utruleg gøy å stå på scena her. Publikummet på Sunnmøre, minner meg litt om publikum heime. Eg føler dei relaterer seg til same humoren og galskapen som eg gjer. Dei er litt lausare i snippen, forklarar Valen.

Han meiner det eksisterer ein forskjell på mottakinga han får i den litt meir perifere delen av landet, kontra det han får i dei større byane.

– Det er vel kanskje litt kontroversielt å seie det, men min humor strekker seg utanfor ring to i Oslo. Eg trur at folk har ei litt anna innstilling til show i storbyane – ei «vi får vel sjå om dette er morosamt da»-innstilling. Folk utanfor byane derimot, kjem gjerne med ei innstilling om at dette «skal» bli gøy, resonnerer han.

– Og då blir det gøy, legg han til.

Tøyser med TV-program

I det nye showet blir det parodiar på TV- program, artistar og kjendisar frå inn- og utland.

– Eg har, som de sikkert forstår, fått med meg at TV2 har eit program som heiter «Åsted Norge». Det er ein TV-suksess eg har lyst å tolke. Eg vil med den tolkinga gi folk svaret på «kvorfor, kvisleis og kvordan» ting heng i hop, fortel han på parodisk vis.

Han føyer også til at han har fått med seg at «Gutta på tur» har gjort comeback på norske TV-skjermar, eit gjensyn han sjølvsagt også vil bruke for det det er verdt. Her blir det parodiar når Valen inviterer kjendisar som på ingen måte passar inn som gjester.

– Eg meiner det er so mykje rart i kjendis-Noreg no til dags, med folk som absolutt skal på TV. Korleis gjer dei det? Ved å gjere ting som dei aldri burde behøve å gjere, fleiper Valen.

Gjensyn med gamle karakterar

Men sjølv om det nye showet har mykje nytt å skilte med, blir det også eit gjensyn med nokre av Kristian Valen sine mest populære karakterar–som i notid vil memorere om kva som har skjedd sidan sist.

God blanding

Valen oppmodar folk om å ta turen torsdag 4. oktober. Han lovar ei god blanding med humor og ablegøyer frå scena.

– Eg likar ikkje å gjere ein og same ting i fleire kvarter. Her blir det litt standup, litt parodi, litt musikk, men masse gøy, avsluttar han.