I Søre Sunnmøre tingrett gav den unge bilføraren ei atterhaldslaus tilståing av det han var tiltala for: Ein sein laurdagskveld i sommar blei han registrert med ein fart på 103 km/t på Buholmvegen i Herøy. Fartsgrensa på staden er 60 km/t. Det var tørr veg og god sikt då køyringa skjedde.
Fengsel på vilkår og bot
Retten viser til at dette hastigheitslovbrotet er høgare enn det som kan avgjerast med bot åleine, men lågare enn det som i rettspraksis vil føre til samfunnsstraff eller fengsel utan vilkår. Med tanke på tilståinga fann retten å sette 18 dagar fengsel på vilkår, med ei prøvetid på to år, som ein høveleg reaksjon.
I tillegg til fengselsstraffa vedtok retten ei bot på 13.000 kroner. Også det var i tråd med standarden for slike saker. Retten hadde forståing for, men tok ikkje omsyn til, at dette var ei høg bot i forhold til den unge bilføraren si inntekt.
Tap av førarkort
Retten brydde seg heller ikkje om at ungdomen hadde behov for førarkortet i arbeidssamanheng, men vedtok ei inndraging på ti månader.
Retten viser til at den som er avhengig av førarkort i arbeid, også har ei ekstra oppmoding til å overhalde trafikkreglane. Retten kan ikkje sjå at verknaden av tap av førarrett i ti månader vil vere vesentleg meir byrdefullt for den sikta enn det som normalt kan påreknast i slike saker.