Når eittårsdagen for børsintroduksjonen no nærmar seg, ligg verdien av familieselskapet sin aksjepost (51%) i Fjord1 på rundt 2,7 milliardar kroner.

70 prosent på eitt år

Denne verdien av dotterselskapet Havilafjord sin aksjepost baserer seg på at kursen på Fjord1-aksjane denne veka har vore oppe i over 53 kroner. I løpet av det fyrste året på børsen har marknadsverdien av ferjeselskapet dermed auka med 2,2 milliardar kroner, eller i overkant av sytti prosent.

Fossa fram på børsen

Dei fyrste handlane av Fjord1-aksjen på Oslo Børs (Merkur Market) fann stad 24. mai i fjor til ein kurs på 31 kroner. Denne opningskursen prisa selskapet til 3,1 milliardar kroner, og Havilafjord sin andel til om lag 1,6 milliardar kroner. Opptaket på den ordinære børslista fann stad i august.

Etter det har Fjord1-aksjen fossa fram på børsen i takt med selskapet sin framgang både resultatmessig og i markaden.

Kursen ved årsskiftet prisa selskapet til om lag 4,4 milliardar kroner, og etter ein kursauke på rundt 20 prosent så langt i år har marknadsverdien auka med ytterlegare 900 millionar kroner.

Samtidig med børsnoteringa selde Havilafjord 49 prosent av aksjane og fekk med det inn om lag 1,4 milliardar kroner. Dette var om lag det same som det kosta selskapet å bli eineeigar av det tidlegare fylkeskommunalt eigde ferjeselskapet.

Havilafjord sin andel av dagens marknadsverdi kan dermed sjåast på som «reint pluss» for Sævik si ferjesatsing.

Størst i Norge

Selskapet sin andel i ferjemarknaden nærmar seg no femti prosent etter at Fjord1 har sikra seg ein serie med nye kontraktar det siste året.

Fjord1 si satsing på miljøvenlege ferjer har gitt full utteljing også for Havyard, og førte til kontrahering av eit tjuetals nye ferjer med batteridrift. Ferje nummer ein blei levert denne veka, som den fyrste av til saman tretten som skal byggast ved verftet der Havila eig om l ag 65 prosent.

– Ei grei reise etter at vi fekk full kotroll

Eventyrleg er ikkje eit ord Per Sævik sjølv vil bruke på Fjord1 si utvikling etter at selskapet kom på børs.

– Men at det har vore ei grei reise sidan vi fekk kontroll på selskapet, det vil eg ikkje legge skjul på, seier han.

Teft var kanskje ikkje den mest nærliggande karakteristikken å bruke på Sævik si Fjord1-satsing frå starten av i 2011. Då hadde Havila holding brukt 350 millionar kroner på å kjøpe 41 prosent av eit selskap som året etter gjekk med 100 millionar i tap.

– Då såg vi vel heller rimeleg dumme ut, men våre planar stoppa ikkje der, seier Sævik.

Planen var full kontroll

Strategien med Sævik si ferjesatsing var heilt frå starten av å sikre seg full kontroll over Fjord1, for så å ta selskapet på børs og så gå vidare derifrå.

– Det vi rekna med var at når vi fekk full kontroll og kunne gjere dei grepa vi hadde planar om, så låg der eit potensiale til meirverdi i selskapet. Det viste seg å vere rett, og i dag er vi eit selskap som synest å vere godt likt av investorane på børsen.

Sævik kan ikkje anna enn å seie seg godt fornøgd med utviklinga og den verdiauken som selskapet har hatt frå august i fjor og framover. Kanskje har verdiauken på sytti prosent vore i overkant av det dei forventa også.

Med lange kontraktar og liten risiko, ser Sævik ei rimeleg sikker og god framtid for Fjord1. Han legg heller ikkje skjul på at planane er å vekse vidare frå dagens posisjon som det største ferjereiarlaget i landet.

– Vi har sikra oss mange nye kontraktar, men vil vere med og slåst om det som byr seg framover også, slår Sævik fast.