Fyrste av tretten batteriferjer er døypt

Den fyrste av tretten batteriferjer som Havyard skal bygge for Fjord 1 blei måndag døypt i Leirvik.

1 / 2

Frå venstre: Stian Oksnes, Maskinsjef Fjord 1, Frode Haugland, Kaptein Fjord 1, Tommy Jacobsen, Kaptein Fjord 1, Per Sævik, Skipsreiar, Vegar Sævik, Styreformann Havyard Group ASA og Fjord 1, Geir Johan Bakke, Administrerande Direktør Havyard Group ASA, Lasse Stokkeland, Dagleg Leiar Havyard Ship Technology, Dagfinn Neteland, Administrerande Direktør Fjord 1 og Anne Gine Hestetun, Fylkesordførar i Hordaland.

I ei pressemelding skriv Havyard at ferja er den fyrste av fleire batteri-ferjer som skal byggast til Fjord 1 ved Havyard Ship Technology i Leirvik. Ferja har også autocross, eit system for automatisk fjordkryssing. Det er levert og utvikla av Norwegian Control Systems.

MF Hausvik skal gå i Hordaland ved ferjesambandet Husavik–Sandvikvåg (Austevoll Kommune og Fitjar Kommune).

– Godt å vere i gang

Den fyrste av tretten ferjer blei døypt i dag ved verftet i Leirvik i Sogn. Fylkesordførar i Hordaland, Anne Gine Hestetun var Gudmor.

Representantar frå Fjord1 og tilsette ved verftet var til stades. Etter dåpen var det opent skip for alle som ville sjå nærare på ferja.

– Det har blitt ei flott ferje og vi er godt fornøgd med resultatet, seier administrerande direktør i Fjord1, Dagfinn Neteland.

– Det er godt å vere i gang, seier Lasse Stokkeland, dagleg leiar ved Havyard Ship Technology

– Det har vore tøff konkurranse rundt kontraktane og at vår fyrste batteri-ferje er døypt og straks klar for overlevering er veldig motiverande. No er det full fokus på å levere alle dei andre ferjene også på tid, budsjett og med same gode kvalitet, held han fram.