Oftast er det ordføraren vi ser klippe snora når noko skal opnast i Kommune-Noreg. Men når ein av eigarane av barnehagen tilfeldigvis er Herøy Høgre sin ordførarkandidat, samtidig som det er valkamp og statsministeren skal på Herøy-besøk like etter at det nye uteområdet til barnehagen er ferdig – ja, då vert det gjerne litt annleis.
Fekk uteområde i 30-årsgave
Det sprakar litt i høgtalaren oppe på «sjørøvarskuta» i Troll-myra barnehage i det eigar og ordførarkandidat Tine Storøy snakkar inn i mikrofonen
– Troll-barnehagane består av to barnehagar: Troll-lia barnehage og Troll-myra barnehage. Den 1. oktober i år er Troll-lia 30 år, kunngjer ho, til jubel og hurrarop frå dei mange gjestane nede på bakken.
– Då tenkte vi at vi var nøydde til å markere det skikkeleg – med at vi lagar nye uteområde i begge barnehagane, fortel ho.
Troll-lia sin nye leikeplass var ferdig til jul, medan arbeidet i Troll-myra har heldt fram heilt fram til juni/juli.
– Kva passa då betre enn å få statsministeren hit for å opne? Det er vi veldig stolte av, seier Storøy, som eig barnehagane i lag med Inger Kristin Håheim Vike.
Med politisk bodskap
Det går litt tid før Erna Solberg kjem seg opp i «sjørøvarskuta» – eit av dei store, nye leikestativa som barna i Troll-myra barnehage for lengst har teke i bruk. Ikkje fordi ho strever med å kome opp (ho tek trappene), men fordi det er så mange som vil helse på ho og ta bilde med ho når ho først er i Herøy. Dessutan må no barna få syngje først. Tre songar syng dei, og etterpå skryter statsministeren.
Det vert sjølvsagt ein liten tale med eit politisk bodskap før Solberg nyttar den tildelte saksa (Ho kan elles informere om at ho er blitt ganske god på å opne ting, og at ho har nytta både øks, kniv og gravemaskin).
– Nesten alle barn i Noreg går i barnehage. Barnehagen er utruleg viktig for alle som går der, både når det gjeld tryggleik, trivsel og leik. Men barnehagen er også eit viktig område for å jobbe med førebyggande og tidleg innsats: Å hjelpe dei vi ser at kanskje treng litt ekstra, også når det gjeld sosiale ferdigheiter. Det som gjer at ein er rusta for å klare seg i vaksenlivet startar faktisk med det som skjer i ein god og trygg barnehage – Ein barnehage som gir meistring, men som også viser at vi kan leike og ha det gøy, seier Solberg.
Ho kommenterer også kor bra ho synest et nye uteområdet til Troll-myra barnehage har blitt.
– Det er fantastisk fint å sjå kva for moglegheiter de har til å drive med klatring, fysisk utfalding, balanseøving og alt mogleg her.
Etter talen, vert det tid til eit sjokoladekakestykke og ein kaffitår, før turen går vidare til neste post på programmet: Den offisielle opninga av det nye valkampkontoret til Herøy Høgre, som du kan lese om her:
Dette sa ho til Herøy-folket
- Meir for alle
Anett Mari Hodneland Tarberg går for det meste rundt og smiler. Det er ein stor dag for henne. Ho har trass alt vore barnehagestyrar i 29 år, først for Troll-lia og seinare også for Troll-myra, etter at banehagen vart opna i 2006.
– Troll-lia har eit spesielt og heilt naturleg uteområdet. Her i Troll-myra har vi ikkje det, så vi har i større grad måtte oppsøke fjell og fjøre. No som området er blitt oppgradert, vert det litt meir for alle aldersgrupper, seier Tarberg.
Ho understrekar elles at sjølv om begge barnehagane no har fått oppgradert uteområda sine, vil dei halde fram med å ta med barna ut på utflukter.
Til slutt nyttar ho høvet til å skryte av Lekolar, som har levert dei nye leikeområda.
– Dei fekk berre eitt stikkord, og det var at det skulle vere maritimt. Det er blitt utruleg fint, seier Anett Mari Tarberg.