– Då kan de berre leite!
Turleiar Anette Valseth Kvalsvik i Barnas Turlag Herøy smiler breitt i det dei mange barna skyt ut frå tribunen framfor ho, og spring til alle kantar over spelplassen på Herøy gard.
Dei har kome i samla tropp frå parkeringsplassen. Ein av dei andre turleiarane, Gry Dragsund-Vike, prøvde på eit tidspunkt å telje dei.
– Vi skvatt litt då vi så kor mykje bilar som kom. Eg tippar vi er over 200 her, seier ho.
Den vesle køen med vinnarar framfor gapahuken er ikkje spesielt lang.
16 barn har vore heldige og funne kvart sitt påskeegg. Inni ligg det nokre nummererte pappbitar. Dei får barna bytte inn i små premiar.
Adrian N. Værnes (4) er ein av dei heldige.
– Eg fann degget under ein stein, seier han.
Premiane består av små posar med godteri og nokre rekvisittar sponsa av Ålesund-Sunnmøre Turistforening. I seks av netta ligg der endå til ein kinobillett, sponsa av Fosnavåg kino.
– Og så har Kiwi sponsa oss med frukt og grillkol, informerer Valseth Kvalsvik.
Mange av dei frammøtte har med seg pølser og anna grillmat for anledninga.
Fruktene, store kasser med bananar og klementinar, finn gjestane på eit av piknikborda.
Men det store gullegget ved sida av ser ut til å freiste meir. Det er nemleg stappfullt med smågodt – trøystepremiar til alle dei som ikkje fann egg.
Det er elles ikkje sjølve påskeeggjakta som er hovudpoenget med denne dagen i regi av Barnas Turlag Herøy.
– Alle er ikkje på påskeferie, og vi tenkte å lage til noko sosialt for dei som er heime. Herøy gard er tilgjengeleg for dei fleste, seier Valseth Kvalsvik.
– Og så håper vi på å rekruttere nokre turleiarar, legg ho til.
Neste arrangement i regi av turlaget er Moltumila på Moltustranda Mosjonsfestival i mai.
– Og så ser det meininga at vi skal få til ein tur til Hidsegga i lag med Barnas Turlag Hareid i mai-juni ein gong, avsluttar Valseth Kvalsvik.