- No er det stort håp om at eg får kalle meg norsk og bu heime hos familien i Norge!

Det sa ei gledesstrålande Julia Oleynik Sætre til Vestlandsnytt, kort tid etter at statsråden hadde ringt til familien med bodskapen om den nye instruksen.

23-åringen ser no fram til å kunne planlegge framtida si i Norge. Ho håpar å kunne ta del i det norske samfunnet på lik linje med oss andre, og ho fortel at ho har planar om utdanning og livet vidare.

- Dei siste signala er ein stor lettelse, seier Julia etter at justisministeren sette ned foten.

Då vi snakka med ho torsdag ettermiddag, hadde ho akkurat snakka med mor si og andre i familien i Russland og fortalt om den seinaste - og gode - utviklinga i saka.

Gode støttespelarar

Pappa Kenneth og resten av familien har hatt masse gode støttespelarar i kampen for å sikre Kenneth si biologiske dotter fast opphaldsløyve i Norge.

- Det har vore massevis av gode krefter i sving. Syster mi, Linda, har gjort ein umåteleg fin innsats. Også ordførar Dag Vaagen må nemnast spesielt. Han har gjort ein kjempejobb inn mot administrative og politiske styresmakter. Fokus på saka i media har også vore medverkande, seier Kenneth til Vestlandsnytt.

Tydeleg jusprofessor

Familien gjekk tidlegare i haust ut i VG om den heilt spesielle saka. Julia vaks opp i Russland hos mor si, men har heile vegen visst om sin biologiske far i Norge. Noko UDI hengde seg opp i då dei gav avslag på søknaden om familiegjenforeining og fast opphaldsløyve for Julia i Norge, er det faktum at det var ført opp ein annan mann som "pappa" då Julia vart fødd.

Seinare har det mellom anna gjennom DNA-testing blitt slått ettertrykkeleg fast at Kenneth er hennar far.

Ein kjend jus-professor, Mads Andenæs, har seinare uttala at UDI har tolka lova feil. Med vising til at Kenneth er hennar biologiske far.

Ein ny instruks datert 25. oktober 2018 - tydeleg utforma i samband med Julia-saka - slår no fast at born med norske foreldre uansett skal vere sikra opphaldsløyve hos sine norske foreldre.

"Det er viktig at barn av norske foreldre kan få komme til Norge selv om forelderen ikke var registrert som juridisk forelder på fødselstidspunktet", heiter det mellom anna i den ferske instruksen.

– Saka til Kenneth Sætre og dottera hans gjorde oss merksame på at regelverket ikkje fungerte slik det burde. Vi såg eit behov for å presisere foreldrebegrepet for å unngå urimelege utslag i praksis, seier Wara til vg.no søndag kveld.

- Vi har vore veldig spente

Kenneth Sætre hadde, då vi snakka med han torsdag ettermiddag, knapt fått summa seg etter gladmeldinga frå ministeren.

- Onsdag ringde dei frå justisdepartementet og varsla at ministeren skulle ringe meg torsdag. Det er klart vi har vore spente. No tyder alt på at saka blir fornuftig avgjort, seier Kenneth Sætre.

Han har fått beskjed om at UDI har fått ein ny instruks frå statsråden i denne saka, og at saka skal behandlast på nytt.

- Eg har mista det som var av tillit til forvaltingsapparatet. Det er tydeleg at dei har tolka lova feil, og no skal dei altså gå gjennom saka på nytt. Etter mitt begrep burde dei ha lagt vekk denne saka for godt.

- Men praten med ministeren var vel avklarande?

- Det var han. No tilseier alt at Julia får bli hos meg og dei andre i familien. Dette er ein kjempedag, avslutta ein lukkeleg far torsdag ettermiddag.

(Denne saka stod først på trykk i Vestlandsnytt torsdag ettermiddag. Meir utfyllande informasjon vi mottok i etterkant gjorde at vi valde å ta saka av nett, før artikkelen søndag kveld vart publisert med enkelte justeringar. Red.)