Eit tips kom inn til Vestlandsnytt om at nokon har gjort hærverk på leikeplassen på Huldal. Vestlandsnytt har undersøka området, og snakka med folket som bur på Huldal. Nokre fortel at det ikkje er fyrste gong dette har skjedd. For ei stund tilbake vart trampolinen som står der skjært opp og øydelagd. No har den vorte vandalisert igjen.
Eit stort, firkanta hol har blitt laga i lakenet, og mange av fjørene har vorte røska ut. Reiestativet har også fått seg ein knekk, der nedste hjulet på den eine reia berre heng og sleng.
– Føresette må snakke med borna sine
Fleire av bebuarane på Huldal fortel også om støy og leven frå ungdomar som oppheld seg på leikeplassen til langt på natt i helgene, og at det ikkje er mogleg å sove med ope vindauge, spesielt på sommarstid. Ein fellesnemnar er mopedar som øydelegg nattesøvnen. No lurer dei på om nokon snart skal ta tak i problemet.
– Med ein gang det vert oppdaga skadeverk og støy, ber eg om at det vert ringt inn til politiet på 02800, uavhengig av tid på døgnet. Då får vi sendt ei politipatrulje til staden slik at dei kan snakke med dei det gjeld. Føresette som veit at borna sine oppheld seg der, må snakke med dei, og fortelje at ein ikkje skal drive med uønskt åtferd med mopedar og øydelegging av fellesgode, seier lensmann Tor Sæther.