Herøy kommune har ikkje noko system på plass som gjer at kaiene genererer inntekter av betydeleg storleik. Ikkje er det dekning for enda ei kai i budsjettet for neste år, i tillegg til at budsjettet er saldert med luftinntekter. Herøy kommune er på veg mot ein kjempesmell.

Kva tid skal folk og kommunestyre vakne? Herøy AP og Herøy Høgre gjekk ilag hausten 2021 om å bygge cruise-kai, etter møter på bakrommet. Konsekvensen er at pengane som skulle vere nok til tre kaier, berre var nok til to. Det burde ikkje vere ei overrasking for nokon at vi er komen i den situasjon vi er i no. Herøy kommune må no velje mellom å likebehandle Fosnot og Egersund Herøy, og ein uansvarleg økonomisk politikk. Eg og Herøy FrP var klokkeklar på det ekstraordinære kommunestyremøte hausten 2021. Vi såg denne situasjonen kome, og ville sikre at der var pengar igjen til å bygge kai til Fosnot, ved å ikkje bygge cruise-kai på dåverande tidspunkt.

Det er totalt uansvarleg av Herøy kommune å bygge fleire kaier så lenge ein ikkje greier å forsvare investeringa med auka inntekter. Dei ekstra driftskostnadane som 90-100 millionar med ekstra lån medfører, kunne blitt brukt på fleire varme hender i helsevesenet eller fleire lærarar i klasseromma. Dette er pengar som burde gått til våre unge og eldre. Korleis skal Herøy Høgre finansiere ny Bergsøy skule når dei bruker opp pengane på cruise-kai? Og kva tid skal Herøy AP oppfylle løftet om «vanlege folk sin tur»?

Herøy FrP prøver å vere konstruktive i denne saka, og vi ønskjer rigge drifta av kommunale kaier slik at vi får meir inntekter. Om vi greier det, så har vi eit godt grunnlag for vidare vekst og utvikling for næringslivet på Mjølstadneset. Vi har foreslått eit felles driftsselskap for eigedom og kommunale kaier, og kommunestyret blei med på å be administrasjonen greie ut ein slik driftsmodell. Herøy kommune må realisere meir av inntektspotensialet på kaiene vi allereie har, før vi kan bruke enda fleire titals millionar. No er det ungane, elevane, dei sjuke og dei eldre som tek kostnaden for kaiene, slik kan vi ikkje ha det!

Karl-Oskar Sævik Leiar i Herøy Frp