Vi går ei spennande tid i møte i Herøy, politisk sett. Medan politikarane no førebur seg på at valkampen skal kome i gang for alvor, får dei folkevalde i fanget svaret på den bestillinga dei sjølve gav til kommunedirektøren i vinter. Ved førre budsjettbehandling gav nemleg kommunestyret beskjed om at budsjettet skal salderast med store driftsinnsparingar og auka inntekter.
Føreslår å legge ned skular og barnehagar i Herøy
Lista frå kommunedirektøren er klar, og her finn vi ei rekkje forslag som garantert kjem til å bli gjenstand for tøffe drøftingsrundar. Skulane og barnehagane på Leikong og Moltu er føreslegne nedlagde, og ei rekkje andre tøffe kutt er føreslegne. Som til dømes å ikkje leige inn vikarar ved sjukemeldingar på Buhab, men også mykje anna som vil påverke tenestene. Trass ei omfattande kuttliste er innsparingskravet likevel ikkje nådd.
Før den politiske behandlinga er i gang, har Utdanningsforbundet i Herøy allereie kome på bana med åtvaringar. – Vi som arbeider i oppvekst kjenner at det stikk langt inn i hjarterota, for vi kjenner på kroppen kvar dag at vi ikkje har ei einaste krone å avsjå, skriv forbundet i eit innlegg i Vestlandsnytt. Fleire reaksjonar er i ferd med å bli utarbeidde.
«NEI til meir kutt og nedprioritering av barn og unge i Herøy!»
Opptakta til kuttlista er på enkelte vis lik den Sande kommune var gjennom for få år tilbake. Også der vart det slått alarm om at utgiftene er for store. Resultatet: To skular vart nedlagde, etter ein til dels opprivande kamp. Ironisk nok var Trond Arne Aglen kommunedirektør i Sande gjennom denne tøffe prosessen, utan at det nødvendigvis har så mykje med saka å gjere. Men likskapane er der.
Herøypolitikarane har fått ei formidabel utfordring på bordet. Om det ikkje skal kuttast eller i tenestene, korleis skal ein då kome i driftsmessig balanse?