Vi i aksjonsgruppa “Nei til nedlegging av Åram ferjekai” jobbar med å overtyde fylkeskommunen til å ikkje fatte vedtak om å legge ned ferjekaia vår. Vi har sendt følgjande brev til fylkespolitikarane, som i første omgang skal behandle saka i samferdselsutvalet den 1. mars.

Først vil vi takke alle dykk som tok turen til Åram på Vanylven kommune sitt møte om Åram ferjekai den 13.02. Vi er godt nøgd med full sal, og med alle dei som hadde gode appellar og innspel. Konsekvensane av ei eventuell nedlegging av Åram ferjekai er store, ikkje berre for folket som bur på kyststripa mellom Fiskå og Sørbrandal, men for heile Vanylven og Sande kommunar. Dette kom tydeleg fram i møtet, men vi vil likevel få repetere ein del av dei viktigaste konsekvensane. Samstundes har vi i aksjonsgruppa ein del forslag til kva vi meiner bør vektleggast når saka skal handsamast i dei ulike instansane. Til sist legg vi ved ei oppdatert liste med signaturar og kommentarar som vi har samla inn.

Ei eventuell nedlegging av Åram ferjekai vil føre til at dagens firkantsamband vil miste 6 av reisestrekningane: Kvamsøy-Åram, Voksa-Åram, Åram-Larsnes og returane på desse. Dei som reiser frå Åram og nordover vil få forlenga reisevegen med omlag 25 minutt kvar veg, 50 minutt per dag for pendlarar. Dei som reiser frå Kvamsøy/Voksa og skal sørover, vil få eit enno lenger tillegg då dei må ta to ferjer. Alle dei som nyttar desse strekningane i dag, enten det er til arbeidspendling, transport/sal av varer og tenester, studentar og skuleelevar, feriegjestar og turistar, dei som besøker slekt og vener, reise til kulturarrangement, reise til helsetenester/tannbehandling, bistand til brann- og redning, ambulanse og annan sjuketransport osv. vil bli hardt råka. Ikkje berre blir reisevegen lengre, men den blir dyrare og mindre miljøvennleg.

For næringslivet i Vanylven og på øyene vil ei nedlegging ha store konsekvensar. Mange her satsar på turisme, og redusert ferjetilbod betyr mindre turistar. Leveranse av varer og tenester vil ta lengre tid og bli dyrare. Det blir ei konkurransevriding som er uheldig for eksisterande næringsliv og for framtidig næringsutvikling i regionen. Åram er med si plassering eit naturleg knutepunkt, og når Stad skipstunnel kjem vil den gi rom for vidare vekst og utvikling i regionen i åra som kjem. All båttrafikk gjennom tunnelen vil også passere gjennom Åramsundet.

Det framstår som soleklart at ei nedlegging av ferjekaia vil vere irreversibel. Krava til utbetringar for å kunne ta imot ei større ferje vil ikkje bli oppfylt, og det er svært viktig at det ikkje blir fatta vedtak om nedlegging. Det er ikkje som ved andre kutt der ein kan skru opp og ned frekvensen eller ta ut og sette inn ferjer. Her vil alle dei berørte miste eit samferdselstilbod dei har hatt i over 50 år, for all framtid.

Ei nedlegging kan ikkje grunngjevast i innsparingar på ferjedrifta totalt sett. Oppgraderinga av ferjekaiene er ein investeringskostnad som er planlagt for fleire år sidan, og vi kan ikkje sjå at å kutte Åram skal gi reduksjon i driftskostnadane på sambandet verken på kort eller lang sikt. Dagens anbod er vel gjeldande til 2031, og etter det trengs det ogsåferje som vil måtte gå den same distansen per tur og med det same kravet til mannskap. Ei nedlegging kan ikkje grunngjevast i auka frekvens. Ferja må uansett passere tett påÅram på strekninga Voksa-Larsnes, og ei innsparing i tid på kvar rundtur vil vere minimal.

Ei nedlegging kan ikkje grunngjevast med dårleg tilstand. Åram ferjekai er ei av dei tokaiene som er i best stand på sambandet. Det er ikkje tilstanden som gjer at det er krav om oppgradering av ferjekaia, men at det trengs justeringar for å kunne ta imot ei større ferje.

Nytt inntektssystem for fylkeskommunane meiner vi ikkje på nokon måte kan nyttast som grunngjeving for å legge ned Åram ferjekai. Rapporten frå eit ekspertutval er publisert og ute på høyring med frist 3. mars. M&R og fleire andre kystfylke kjem her uheldig ut når det gjeld overføringar frå staten og dermed midlar til samferdsel. Mange vil heilt klart protestere mot ei slik omfordeling, og ei justering av inntektssystemet der det blir overført meir midlar til fylke der ein er avhengig av ferje, ser vi på som sannsynleg. Denne rapporten er på langt nær nokon fasit på korleis inntektssystemet vil bli verken i nær eller fjern framtid.

Dersom ein skal nytte argumentet om at «alle må bidra»når fylket skal kutte, vil vi påpeike at det er under 3 år sidan den vidaregåande skulen i Vanylven vart ofra for at fylket skulle spare pengar. Som kompensasjon vart vi den gongen lova betre kollektivtransport, spesielt med tanke på skuleelevar som no måtte pendle betydeleg lengre for å gå på skule. Denne kompensasjonen har vi ikkje sett så mykje til, og å ta bort eit av to ferjesamband frå kommunen meiner vi er totalt feil veg å gå. Å legge ned ferjesambandet på Åram vil fjerne den siste moglegheita ungdommen i dag har til å bu heime og pendle til vidaregåande skule.

For oss framstår det også merkeleg å innføre gratis ferje på fleire av sambanda i fylket, dersom ein i neste instans blir tvinga til nedskjeringar og nedleggingar. Kva skal ein med gratis ferje, dersom ferja ikkje lenger går dit vi skal og når vi treng den? Det som også gjer situasjonen absurd, er at strekninga Åram-Larsnes er den einaste på sambandet der ein må betale for bil og dermed det einaste som i dag gjev ei viss inntening. Dette er no altså foreslått tatt bort frå sambandet.

Ein må også vere forsiktig med å bruke statistikk som argument for nedlegging. Koronaepidemien er ein faktor som sterkt har påverka ferjestatistikken dei siste par åra. Vi vil også påpeike at ferjesambandet i det aller siste viser ein oppsving i trafikktala for dei fleste strekningane på firkantsambandet, ref. tal framlagt på møtet av leiar i Vanylven Utvikling, Tor Inge Nygård. Dersom ein skal sjå på tala på bilar som reiser Larsnes-Åram, må ein også vere klar over at ein del trafikk allereie i dag vert omdirigert til Årvik-Koparnes på avgangar med mykje trafikk til Voksa/Kvamsøy. Tala ville heilt klart vore høgare dersom ein hadde hatt hyppigare avgangar eller større plass på ferja.

Vi i aksjonsgruppa står med rak rygg og veit vi har stor støtte frå folk i alle bygdene rundt firkantsambandet vårt. Vi veit at folk og næringsliv på øyene i Sande sterkt ønsker seg auka frekvens på sambandet. Men vi veit samstundes at dei ikkje ønsker dette på bekostning av Åram ferjekai. Åram ferjekai må bestå inntil eit fastlandssamband er på plass.

Med vennleg helsing

Aksjonen «Nei til nedlegging av Åram ferjekai»

Frode Høgset, Njål Sivertstøl, Tonje Ramse Trædal, Ove Sivertstøl