Fyrste gong, men klare for neste år

Berre etter fyrste øvingane er dommen til Anton Sævik, Ella-Johanne Sande Sævik, Linda Dalehamn klar. Blir det Herøyspel neste år for deira del? Eit rungande ja.

Regnvêret plagar ikkje dei: F.v. Anton Sævik, Ella-Johanne Sande Sævik og Linda Dalehamn vert ikkje skremt vekk av vêret, det håpar dei også publikum tek lærdom av til helga.   Foto: Bjørnar Torvholm Sævik

Kultur

– Ja, dette er skikkeleg artig, eg er faktisk klar for neste år allereie, smiler Linda Dalehamn, og får stadfestande nikk frå Anton Sævik og Ella-Johanne Sande Sævik.

Det ser mest ut som dei tre kjem rett frå dusjen, og det er ikkje langt frå sanninga. I motsetning av fleire av dei andre travarane i herøyamfiet denne tysdagskvelden, er dette den fyrste gongen dei tre er med i spelet. Anton skal spele hirden Kolbein Sterke, Ella-Johanne spelar Herøy-barnet Gilja Gormsdotter og Linda Spelar hærøyværingen Kvålhild frå Leikanger.

Bra stemning

Vi spør dei tre kva som gjer dei så skråsikre på å melde seg neste år igjen, til det svarar Ella-Johanne at dette rett og slett har med stemninga å gjere.

– Dessutan er folket her veldig inkluderande, og dei drog oss med veldig fort, avsluttar Anton, som saman med dei to andre oppmodar om å kome og sjå spelet til helga, det skal vist vere mykje nytt, påpeiker dei.