– Eg bøyer med i støvet, eller … nei veit du kva, det finst ikkje nok støv å bøye seg i.
Det sa ei smilande Ira Sarucco Ulvan rett etter å ha sett storshowet Be’glorious på Herøy kulturhus laurdag ettermiddag. Og Ulvan var langt ifrå den einaste som let superlativa hagle over elevane som stod på scena. For det skal nok litt til for ikkje å ha late seg imponere over kva dei leverte.
Variert og uttrykksfullt er to dekkande omgrep når ein skal omtale showet, for i løpet av den halvannan timen publikum sat i salen var vi innom eit rikt spekter av innslag, med alt ifrå ballet og rolege solonummer til intense danserytmar og fargesprakande sirkusstemning. Utan å vite det heilt sikkert, såg det ut til att alle som ein kosa seg på scena, både dansarane, instrumentalistane og songelevane. Ei som stadfesta dette var songar og låtskrivar Jenny Mari Bøe. Ho var invitert som gjesteartist for høvet og framførte to sjølvskrivne låtar.
– Det er alltid spennande og litt skummelt å framføre, men det er utruleg givande og kjekt å få lov til å framføre min eigen musikk. Så er gjengen her fantastisk flinke og eg har kosa meg veldig den siste veka eg har for jobba saman med dei, sa ho etter fyrste førestilling til Vestlandsnytt.
– Utruleg stolt og imponert
I kjølvatnet av den flotte førestillinga er det stolte kulturskulelærarar som no ser attende på prosessen det har vore med å sette i stand førestillinga. Det stadfestar Aina J Eliassen.
– Eg er så utruleg stolt og imponert over alle som var med! Ei slik førestilling krev mykje arbeid, og eg og Karoline Velsvik Sivertsen står på heile året for at kvar detalj skal gå smertefritt. Men det aller viktigaste er å få til eit svært samarbeid med alle som skal framføre, og at alle føler ansvar og ser kor viktige dei er for heilskapen. Utan den energien du får som menneske når du føler deg sett, så hadde førestillinga blitt heilt annleis. Dette er elevane sin dag! Det er her dei viser korleis deira personlegdom, deira energi, tankar, ord og kjensler har inspirert oss lærarane. Herøy kulturskule er kjempeheldige som får bli kjent med alle desse unike menneska. Og vi har lyst til å bli kjent med fleire, skryt Eliassen.