Med Slinning ved roret skal Rimfrost vekse som aktør i krillmarknaden, heiter det i ei pressemelding i samband med nytilsettinga.
Stor vekst
Rimfrost opplevde i 2017 stor vekst i salet av krillprodukt for menneskeleg konsum. Særleg stor var veksten på den amerikanske marknaden.
– Denne veksten held fram i 2018, og samtidig ser vi mulegheitene krillprodukta kan ha i fòr til oppdrettsfisk, seier Rimfrost-eigar Stig Remøy.
Med bakgrunn frå Ewod, Marine Harvest og BioMar Group har slinning kompetanse også på oppdrettsområdet.
Slinning seier at slik han ser det er Rimfrost den som er komen lengst i verda med å utnytte krillressursen på ein effektiv og berekraftig måte.
Lang erfaring
Slinning har lang erfaring frå oppdrettsbransjen, og kjem frå stillinga som direktør for kvalitet og berekraft i Denofa.
Han er utdanna ved Universitetet i Bergen med ein fagkombinasjon som mellom anna omfattar kjemi, biologi, biokjemi og ernæring. Han har jobba både innan forsking og i næringslivet, og har mellom anna vore forskar ved Fiskeridirektoratet sitt ernæringsinstitutt.
Satsar på nye konsesjonar
Fiskeridirektoratet lyste nyleg ut to nye konsesjonar for krillfiske i Antarktis. Frå før har Rimfrost ein konsesjon, og planlegg også å ta del i den nye konsesjonstildelinga.
– Vi har teknologien som sikrar høg utnytting av fangsten og høg kvalitet på produkta. Vi ser fram til å vekse som aktør i krillmarknaden, og til Karl-Erik sitt bidrag i dette arbeidet, seier Remøy.